మాకు 230కి తగ్గవు: వైయస్

హైదరాబాద్: రాష్ట్ర ముఖ్యమంత్రిగా ఐదేళ్లు ఎంతో సంతృప్తికరంగా గడిచాయని వైఎస్‌ రాజశేఖర్‌రెడ్డి అన్నారు. ముఖ్యమంత్రిగా ఐదేళ్లు పూర్తి చేసుకున్న సందర్భంగా ఒక ప్రైవేట్‌ ఛానెల్‌లో ఆయన మాట్లాడారు. 2004 మే 14న వైఎస్‌ సీఎంగా ప్రమాణ స్వీకారం చేశారు. రాష్ట్రంలో కాంగ్రెస్‌ గెలుపుపై తన అంచనాలు ఇప్పటికీ మారలేదని 230 అసెంబ్లీ సీట్లు కచ్చితంగా గెలుస్తామన్నారు.

మరో ఐదేళ్లు రాష్ట్ర ప్రజల సంక్షేమం, అభివృద్ధే తమ ప్రాధాన్యమన్నారు. భాజపాతో కలిసేందుకు ఏ పార్టీ ముందుకు రాదని యూపీఏ మళ్లీ ప్రభుత్వాన్ని ఏర్పాటు చేస్తుందన్నారు. సీఎంగా వైఎస్‌ ఐదేళ్లు పూర్తి చేసినందుకు మంత్రులు ధర్మాన ప్రసాదరావు, సంభాని చంద్రశేఖర్‌, ఇతర ఉన్నతాధికారులు ఆయన్ను కలిసి అభినందనలు తెలిపారు.