82కు చేరిన తుఫాను మృతులు

కోల్ కత్తా: పశ్చిమ బెంగాల్ ను తాకిన ఐలా తుఫాను వల్ల మరణించినవారి సంఖ్య 82కు చేరుకుంది. 24 పరగణాస్ జిల్లా తుఫాన్ తాకిడికి అతలాకుతలం అయింది. చెట్లు విరిగి పడ్డాయి. పవర్ కేబుల్స్ తెగిపడ్డాయి. సహాయక చర్యలను ముమ్మరం చేశారు. తుఫాను తాకిడికి 4 లక్షల మంది విలవిలలాడి పోయారు. డార్జిలింగ్ లో 22 మంది మరణించగా, నార్త్ 24 పరగణా జిల్లాలో 16 మంది మృతి చెందారు.

సౌత్ 24 పరగణాలో 15 మంది, కోల్ కత్తాలో 9 మంది మరణించారు. హౌరాలో ఏడుగురు, హూగ్లీలో ఐదుగురు, ముర్సిదాబాద్ లో ముగ్గురు, బిర్భూమిలో ఇద్దరు, మాల్దా, ఈస్ట్ మిడ్నాపూర్, బకురా ల్లో ఒక్కరేసి మరణించారు. ముఖ్యమంత్రి బుద్ధదేవ్ భట్టాచార్య మంగళవారం తుఫాను తాకిడి ప్రాంతాలను సందర్శించారు.