పిల్లలతో అక్షరాలు దిద్దించిన వైయస్

హైదరాబాద్‌: బడిఈడు పిల్లలను బడిలో చేర్పించేందుకు ఉద్దేశించిన బడిబాట కార్యక్రమాన్ని ముఖ్యమంత్రి రాజశేఖరరెడ్డి శుక్రవారం తన క్యాంపు కార్యాలయంలో ప్రారంభించారు. ఈ సందర్భంగా పలువురు చిన్నపిల్లలకు సర్టిఫికెట్లు ఇచ్చి వారిని బడిలో చేర్పించారు. కొంతమంది పిల్లలతో అక్షరాలు దిద్దించారు. అనంతరం బడిబాట పోస్టర్లను ఆవిష్కరించారు. పాఠశాల, సర్వశిక్షా అభియాన్‌ మంత్రి అహ్మదుల్లా, మహిళా శిశు సంక్షేమ శాఖ మంత్రి కొండా సురేఖలు కూడా బడిబాల కార్యక్రమాన్ని లాంఛనంగా ప్రారంభించారు.

బడిబాట కార్యక్రమాన్ని 15 రోజుల పాటు కొనసాగించనున్నట్లు అహ్మదుల్లా చెప్పారు. ఐదేళ్లు దాటిన పిల్లలను బడికి పంపించాలని తల్లిదండ్రులను చైతన్యపరుస్తామని ఆయన మీడియా ప్రతినిధులతో చెప్పారు. ఐదు లక్షల మంది బడి ఈడు పిల్లలను బడిలో చేర్పించాలని లక్ష్యంగా పెట్టుకున్నారు. పిల్లలను బడికి పంపించి విద్యావంతులను చేయడం వల్ల గ్రామీణ పేదరికం తొలుగుతుందని భావిస్తున్నారు.