16 మందిని పెళ్లాడుతా: రాఖీ

ఉదయ్‌ పూర్‌: బాలీవుడ్ సంచలనాల 'ముద్దు' గుమ్మ రాఖీ సావంత్‌ యువకులకు వెర్రెక్కించే మరో ప్రకటన చేసింది. తాను ఒకరిని కాదు, ఇద్దరిని కాదు, ఏకంగా, 16 మందిని పెళ్లాడాలని రాఖీ సావంత్ భావిస్తోందట! టీవీ రియాల్టీ షో ద్వారా భర్తను ఎంచుకోవాలన్న నిర్ణయంతో హెడ్‌ లైన్లలోకి దూసుకెళ్లిన రాఖీ తాజాగా ఈ విషయాన్ని వెల్లడించి సంచలనం సృష్టించింది.

"మహాభారతంలో ద్రౌపదిలా ఈ పోటీలో పాల్గొంటున్న మొత్తం 16 మందినీ పెళ్లాడాలనిపిస్తోంది" అని ఆమె మీడియా ప్రతినిధుల సమావేశంలో తెలిపింది. 'రాఖీ సావంత్‌ కా స్వయంవర్‌' అనే ఈ కార్యక్రమాన్ని ఉదయ్‌ పూర్‌ లోని పలాటియాల్‌ హోటల్లో చిత్రీకరించారు. ఈ షోలో పాల్గొనడం చాలా బాగుందని, తానో యువరాణిలా భావిస్తున్నానని అంటోందీ సుందరాంగి. తనను పెళ్లాడే అదృష్టవంతుడి పేరు మాత్రం వెల్లడించట్లేదు.