105కు చేరిన కల్తీ మద్యం మృతులు

అహ్మదాబాద్‌: గుజరాత్ లోని అహ్మదాబాద్ లో కల్తీ సారా తాగిన ఘటనలో మృతుల సంఖ్య పెరుగుతోంది. ఈ ఘటనలో ఇప్పటివరకూ 105 మంది మృతి చెందగా వివిధ ఆస్పత్రుల్లో 200 మంది చికిత్స పొందుతున్నారు. ఒదావ్‌, అమరైవాడి, రాయిపూర్‌ తదితర ప్రాంతాల్లో బాధితులు ఆస్పత్రుల్లో చేరుతున్నారు. ఈ ఘటనపై విపక్షాలు అసెంబ్లీలో మోడీ సర్కార్‌పై మండిపడుతుండడంతో ప్రభుత్వం చర్యలు ప్రారంభించింది.

కల్తీ మద్యం అమ్ముతున్న 800 మందిని అరెస్టు చేసింది. 1200 మద్యం దుకాణాలను మూసివేసింది. మరోవైపు మృతుల సంఖ్య పెరుగుతుండడంతో పలు ప్రాంతాల్లో ప్రజలు ఆందోళన చేపట్టి మున్పిపల్‌ బస్సులను ధ్వంసం చేశారు. అడ్డుకున్న పోలీసులపై రాళ్లు రువ్వారు. కల్తీ మద్యం ఘటనపై ప్రజలు ఆందోళన సాగిస్తూనే ఉన్నారు. వీధుల్లోకి వచ్చి బస్సులపై దాడులకు దిగుతున్నారు. మృతుల సంఖ్య పెరిగే అవకాశాలున్నాయని అధికారులంటున్నారు.