తిరుమలలో మహా రద్దీ

తిరుమల: తిరుమలలో ఆదివారం కూడా రద్దీ కొనసాగింది. 'మహాలఘు' ద్వారా 90 వేలమంది స్వామివారిని దర్శించుకున్నారు. వరుస సెలవుల నేపథ్యంలో కొండపై ఎటుచూసినా భక్తులే కనిపిస్తున్నారు. శనివారం రాత్రి రాంభగీచా అతిథిగృహం వరకూ క్యూలైన్‌ విస్తరించడంతో బోర్డు సభ్యుడు చెవిరెడ్డి భాస్కర్‌ రెడ్డి, ప్రత్యేకాధికారి ధర్మారెడ్డితో కలిసి పరిస్థితిని సమీక్షించారు.

భక్తుల ఇబ్బందుల గురించి వాకబు చేశారు. వేకువజామున రెండు గంటల వరకూ నీరు, అల్పాహారం అందించేలా చూశారు. ఈ రద్దీ తరగకపోవడంతో గదులు దొరకటంలేదు. సర్వదర్శనం కోసం దాదాపు పది గంటలకుపైగా నిరీక్షించాల్సి వస్తోంది. నడిచివచ్చే భక్తులకు ఉద్దేశించిన కంపార్టుమెంట్లు కూడా నిండిపోయి, క్యూలైన్‌ బయటిదాకా వ్యాపించడం ఇదే తొలిసారి.