తిరుపతి వెళ్ళకుండానే క్షవరం: బాబు

హైదరాబాద్‌: తిరుపతి దాకా వెళ్లక్కర్లేకుండా ఇక్కడే ధరలు దెబ్బకు నిలువుదోపిడీ అయిపోతోంది అంటూ టీడీపీ అధ్యక్షుడు చంద్రబాబు వ్యాఖ్యానించారు. అలాగే ప్రజల సమస్యలు గాలికి వదిలిపెట్టి ప్రత్యర్థి పార్టీలను చీల్చి ఆ నేతలను చేర్చుకోవడమే పనిగా పెట్టుకొని సీఎం వ్యవహరిస్తున్నారు. సీఎంకు ఈ ఎన్నికల్లో ప్రజలు షాకివ్వాలి అన్నారు. హైదరాబాద్ ఎల్‌ బీ నగర్‌ నియోజకవర్గానికి చెందిన బీజేపీ రాష్ట్ర కార్యవర్గ సభ్యుడు కొప్పుల నర్సింహరెడ్డి, మరి కొందరు నేతలు టీడీపీలో చేరిన సందర్భంగా ఎన్టీఆర్‌ భవన్‌లో వారినుద్దేశించి చంద్రబాబు ప్రసంగించారు.

గడచిన ఐదేళ్లలో కాంగ్రెస్‌ హైదరాబాద్‌కు ఏం చేసిందని గ్రేటర్‌ ఎన్నికల్లో ప్రజలు వారికి ఓటు వేయాలని ఆయన ప్రశ్నించారు. "హైటెక్‌ సిటీ, అంతర్జాతీయ విమానాశ్రయం, బయోటెక్‌ పార్క్‌, బిజినెస్‌ స్కూల్‌ వంటివన్నీ తెచ్చింది టీడీపీ. సైబరాబాద్‌ పేరుతో శివార్లలో ఒక కొత్త నగరం రూపుదిద్దుకొంది మన హయాంలోనే. మనం చేసిన వాటిని చెడగొట్టడం తప్ప కాంగ్రెస్‌ ఏం చేసింది? ఆ పార్టీకి ప్రజలు తగిన శాస్తి చేయాలి" అన్నారు.

ఇక కాంగ్రెస్‌ను ఓడించే శక్తి, సత్తా టీడీపీకి మాత్రమే ఉన్నాయని, మిగిలిన పార్టీలకు ఓటు వేస్తే అది కాంగ్రెస్‌కు లాభం చేసినట్లేనని ఆయన చెప్పారు. కాగా..గ్రేటర్‌ హైదరాబాద్‌ మున్సిపల్‌ కార్పొరేషన్‌ (జీహెచ్‌ ఎంసీ) ఎన్నికల్లో బ్యాలెట్‌ పేపర్‌ వినియోగించాలని టీడీపీ అధ్యక్షుడు చంద్రబాబు నాయుడు కోరారు. ఈ మేరకు ఆయన గురువారం రాష్ట్ర ఎన్నికల కమిషనర్‌ ఎవీఎస్‌ రెడ్డికి లేఖ రాశారు.