మగధీర ప్రదర్శనకు బ్రేక్ : బొత్సా

హైదరాబాద్: విజయనగరం జిల్లాలోని థియేటర్లలో మగధీర ప్రదర్శనను ఆపేయాలని ఆదేశించినట్లు మంత్రి బొత్సా సత్యనారాయణ చెప్పారు. ప్రేక్షకుల ప్రాణాలతో చెలగాటం మంచిది కాదని ఆయన మంగళవారం మీడియా ప్రతినిధుల సమావేశంలో అన్నారు. విజయనగరం జిల్లా సాలూరులో మగధీర సినిమా ప్రదర్శిస్తున్న లక్ష్మీ థియేటర్ టికెట్ కౌంటర్ వద్ద ఆదివారం సాయంత్రం విద్యుదాఘాతం సంభవించిన ఐదుగురు మరణించిన విషయం తెలిసిందే. ఈ నేపథ్యంలో మగధీర ప్రదర్శనను ముందు జాగ్రత్త చర్యగా ఆపేయాలని ఆదేశించినట్లు మంత్రి చెప్పారు.

థియేటర్లలో అన్ని వసతులు ఏర్పాటు చేసి ముందు జాగ్రత్త చర్యలు తీసుకున్నారా అనే విషయాలు పరిశీలించిన తర్వాత మగధీర సినిమా ప్రదర్శనకు అనుమతి ఇస్తామని ఆయన చెప్పారు. రాష్ట్రంలోని మిగతా ప్రాంతాల్లో కూడా కమిటీ పరిశీలన జరుపుతోందని, ఆ పరిశీలనను బట్టి చర్యలుంటాయని ఆనయ అన్నారు. ప్రేక్షకాదరణ ఉన్న సినిమాల ప్రదర్శన సమయంలో ప్రమాదాలు సంభవించినప్పుడు నిర్మాతలు, పంపిణీదారులు, సినిమాకు సంబంధించిన ఇతరులు పట్టించుకోకపోవడం దురదృష్టకరమని ఆయన అన్నారు. బాధిత కుటుంబాలను నిర్మాత అల్లు అరవింద్ పరామర్శించి ఉంటే బాగుండేదని ఆయన అన్నారు. ఇదిలా ఉంటే, థియేటర్లలో భద్రతా ఏర్పాట్లపై మంగళవారం హైకోర్టులో ప్రజా ప్రయోజనాల వ్యాజ్యం దాఖలైంది.