దేవుడి సొమ్ములు పూజారి స్వాహా

తిరుపతి: తిరుపతిలోని కోదండ రామస్వావమి ఆలయం మూల విరాట్ విగ్రహం బంగారు ఆభరణాలను స్వయంగా ప్రధానార్చకుడే దొంగిలించిన వైనం శుక్రవారం సాయంత్రం బయటపడింది. ఆలయ ప్రధానార్చకుడు చిన వెంకటరమణ దీక్షితులు చేతుల మీదుగా అవి వడ్డీ వ్యాపారుల చేతుల్లోకి వెళ్లాయి. తిరుమల తిరుపతి దేవస్థానం (టిటిడి) ఎవీఎస్ఓ బాలిరెడ్డి ఫిర్యాదు మేరకు తిరుపతి పోలీసులు అర్చకుడిని, అతని భార్యను అదుపులోకి తీసుకున్నారు. నగలను కుదువ పెట్టుకున్న వ్యాపారిని మాత్రం వదిలేశారు. నగలను నిఘా విభాగం అధికారులు స్వాధీనం చేసుకున్నారు. అర్చకుడిని టిటిడి సస్పెండ్ చేసింది.

హైకోర్టు ఆదేశాలతో టిటిడి అనుబంధ ఆలయాల్లో ఇటీవల నగల లెక్కింపు ప్రారంభమైంది. దీంతో కోదండ రామాలయంలో నగలు మాయమైన విషయం బయట పడింది. టిటిడి ఈఓ ఐవిఆర్ కృష్ణారావు ఆదేశాల మేరకు దేవస్థానం నిఘా విభాగం అధికారులు శుక్రవారం సాయంత్రం దీక్షితులను మొదట అదుపులోకి తీసుకుని చేపట్టారు. నగలు తాకట్టు పెట్టుకున్న కామధేను ఫైనాన్షియర్ కార్యాలయానికి వెళ్లి రికార్డులు స్వాధీనం చేసుకోవాలని టిటిడి ముఖ్య నిఘా, భద్రతాధికారి పివిఎన్ రామకృష్ణను ఆదేశించారు నిర్లక్ష్యంగా వ్యవహరించిన భద్రతా సిబ్బందిని విధుల నుంచి తప్పించారు.