మరో బిజెపి నేత తిరుగుబాటు

న్యూఢిల్లీ: తాజాగా బుధవారంనాడు మరో బిజెపి నేత పార్టీ నాయకత్వంపై తిరుగుబాటు బావుటా ఎగురవేశాడు. జస్వంత్ సింగ్, వసుంధర రాజే సింథియా, అరుణ్ శౌరీల తర్వాత ఇప్పుడు బిసి ఖండూరీ వంతు వచ్చింది. తన ఉద్వాసనపై ఉత్తరాఖండ్ మాజీ ముఖ్యమంత్రి బిసి ఖండూరీ రాజ్ నాథ్ సింగ్ కు ఘాటుగా లేఖ రాసినట్లు సమాచారం.

లోకసభ ఎన్నికల ఓటమికి తనను బలి పశువును చేశారని ఆయన ఆరోపించారు. తనకు 35 మంది శాసనసభ్యుల్లో 27 మంది మద్దతు ఉన్నప్పటికీ తనను ముఖ్యమంత్రి పదవి నుంచి తప్పించారని ఆయన ఆరోపించారు. ఈ విషయంపై పునరాలోచన చేయాలని ఆయన బిజెపి నాయకత్వాన్ని కోరినట్లు తెలుస్తోంది. ఖండూరీ తిరుగుబాటు వ్యవహారంపై మాట్లాడడానికి బిజెపి అధ్యక్షుడు రాజ్ నాథ్ సింగ్ నిరాకరించారు. కాగా, ఖండూరీకి మద్దతుగా అరుణ్ శౌరీ నిలబడ్డారు.