ఎందుకు దాక్కున్నారు: సబిత

హైదరాబాద్: ఏ తప్పూ చేయకపోతే తెలుగుదేశం కొవ్వూరు శాసనసభ్యుడు తనకు చెందిన వసతి గృహంలోని మూడో అంతస్థు పైభాగన గల వాటర్ ట్యాంక్ కింద ఎందుకు దాక్కుంటారని రాష్ట్ర హోం మంత్రి సబితా ఇంద్రారెడ్డి ప్రశ్నించారు. పశ్చిమ గోదావరి జిల్లా కొవ్వూరు శాసనసభ్యుడు టీవీ రామారావుపై కేసు నమోదు చేయడంపై, ఆయనను ఆరెస్టు చేయడంపై హోం మంత్రి గురువారం శాసనసభలో వివరణ ఇచ్చారు. హాస్టల్ కు వచ్చిన మీడియాకు, పోలీసులకు, ఇతరులకు తాను హాస్టల్లో లేనని రామారావు ఎందుకు తన సిబ్బందితో చెప్పించారని కూడా ఆమె అడిగారు. నా ఇంటికి ఎవరైనా వచ్చి అడిగితే నేను లేనని చెప్పించుకుంటానా అని ఆమె అన్నారు. రాత్రి పూట 11 గంటలకు వాటర్ ట్యాంక్ కింద దాచుకోవాల్సిన అవసరం రామారావుకు ఎందుకు వచ్చిందని కూడా ఆమె అడిగారు. చట్టప్రకారమే రామారావుపై చర్యలు తీసుకుంటున్నట్లు ఆమె తెలిపారు. ఒకే హాస్టల్లో బాలికలకు, బాలురకు కలిపి వసతి ఏర్పాటు చేయడమేమిటని కూడా ఆమె ప్రశ్నించారు.

నర్సింగ్ విద్యార్థినులపై అత్యాచారం కేసులో తనను అన్యాయంగా ఇరికించారని టీవీ రామారావు అందుకు విమర్శించారు. తాను ఎవరినీ విమర్శించడం లేదని, తన బాధను చెప్పుకుంటున్నానని ఆయన అన్నారు. కాంగ్రెసు పార్టీలో చేరనందుకే తనపై కక్ష కట్టి, కేసు పెట్టి అరెస్టు చేయించారని ఆయన ఆరోపించారు. తనకు తగిన న్యాయం చేయాలని ఆయన సభాధ్యక్ష స్థానంలో ఉన్న డిప్యూటీ స్పీకర్ నాదెండ్ల మనోహర్ ను కోరారు. ప్రజాసమస్యలు వినిపించేందుకు తనను ప్రజలు సభకు పంపితే తన సమస్య గురించే శాసనసభలో మాట్లాడాల్సిన పరిస్థితి వచ్చిందని ఆయన అన్నారు. రామారావు మాట్లాడుతుండగా కాంగ్రెసు సభ్యులు కొద్దిసేపు అడ్డుకున్నారు.