వైయస్ షాక్ తో 122 మంది మృతి

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి ఆకస్మిక మృతితో షాక్ కు గురై రాష్ట్రంలో శుక్రవారం మధ్యాహ్నానికి 122 మంది మరణించినట్లు వార్తలు వస్తున్నాయి. వరంగల్ జిల్లాలో అత్యధికంగా 14 మంది మరణించినట్లు తెలుస్తోంది. గుండెపోటుతో 99 మంది మరణించగా, 23 మంది ఆత్మహత్య చేసుకున్నట్లు టెలివిజన్ చానెళ్లు వార్తలను ప్రసారం చేస్తున్నాయి. వైయస్ మృతి వార్తను తట్టుకోలేక మాజీ మంత్రి జక్కంపూడి రామమోహన్ రావు స్పృహ తప్పి పడిపోయారు. వీరిలో ఏడుగురు షాక్ వల్ల, గుండెపోటు వల్ల మరణించగా, ఇద్దరు ఉరి వేసుకుని చనిపోయారు. నరేంద్రపురం గ్రామానికి చెందిన 20 ఏళ్ల ఏసుబాబు, నాగారం గ్రామానికి చెంది 48 ఏళ్ల ఆచంట రామకృష్ణ ఆత్మహత్యలు చేసుకున్నారు.

చిత్తూరు జిల్లాలోని వనమల్ల గ్రామంలో రాజీవ్ ఆరోగ్యశ్రీ ద్వారా లబ్ధి పొందిన దినసరి కూలీ 44 ఏళ్ల బి. పద్మ వైయస్ మృతిని తట్టుకోలేక షాక్ కు గురై మరణించింది. అదే జిల్లాలో పార్వతమ్మ అనే 22 ఏళ్ల యువతి మరణించింది. వైయస్ వీరాభిమాని టీవీ షాప్ యజమాని ఎన్ రాజారెడ్డి గుండెపోటుతో మరణించాడు. గురువారంనాడు ముఖ్యమంత్రి మరణ వార్త వినడంతో భారీ నీటి పారుదల శాఖ మంత్రి పొన్నాల లక్ష్మయ్య అస్వస్థతకు గురై ఆస్పత్రిలో చేరారు.