వైయస్ జగన్ కు మూడు ఆఫర్లు

న్యూఢిల్లీ: వైయస్ జగన్మోహన్ రెడ్డికి ముఖ్యమంత్రి పదవి అప్పగించడానికి కాంగ్రెసు అధిష్ఠాన వర్గం అయిష్టంగా ఉన్నట్లు తెలుస్తోంది. అందుకు ప్రత్యామ్నాయంగా ఆయన ముందు మూడు అవకాశాలను ముందు పెట్టినట్లు ప్రచారం జరుగుతోంది. అనుభవం లేదనే కారణంతో వైయస్ జగన్ ను ముఖ్యమంత్రి పదవి ఇవ్వడానికి నిరాకరిస్తున్నట్లు సమాచారం. ఉప ముఖ్యమంత్రి పదవి గానీ, కేంద్ర మంత్రి వర్గంలో స్థానం గానీ, పిసిసిలో పదవి గానీ తీసుకోవాలని ఎఐసిసి ప్రతిపాదించినట్లు సమాచారం. ఈ ప్రత్యామ్నాయాలపై వైయస్ రాజశేఖర రెడ్డి ఆత్మీయ మిత్రుడు కెవిపి రామచందర్ రావు జగన్ తో చర్చించే అవకాశం ఉంది.

ముఖ్యమంత్రి రోశయ్యకు మంత్రులు సహకరించకపోవడంపై పార్టీ అధిష్ఠాన వర్గం సీరియస్ అయినట్లు తెలుస్తోంది. ముఖ్యమంత్రి కె. రోశయ్యకు మంత్రులు, శాసనసభ్యులు పూర్తిగా సహకరిస్తారని గురువారం కెవిపి పార్టీ అధిష్ఠాన వర్గానికి హామీ ఇచ్చినట్లు తెలుస్తోంది. తాను శుక్రవారం హైదరాబాద్ వెళ్తున్నానని, శనివారం తిరిగి ఢిల్లీ వస్తానని, ఈ విషయం చెప్పడానికి తాను అహ్మద్ పటేల్ ను కలిశానని కెవిపి గురువారం రాత్రి మీడియా ప్రతినిధులతో చెప్పారు.

అయితే జగన్ ను ముఖ్యమంత్రిని చేయాలనే ప్రచారం మాత్రం ఆగలేదు. రాష్ట్ర పార్లమెంటు సభ్యులు కేంద్ర ప్రణబ్ ముఖర్జీని కలిశారు. జగన్ ను ముఖ్యమంత్రిని చేయడానికి పార్టీ అధిష్ఠాన వర్గం సుముఖంగా ఉందని ఎంపీ సాయిప్రతాప్ చెప్పారు.