పాక్ పై హిల్లరీకి చిదంబరం ఫిర్యాదు

వాషింగ్టన్: లష్కరే తోయిబా చీఫ్ హఫీజ్ సయీద్ తో పాటు ముంబై దాడులకు పాల్పడినవారిపై చర్యలు తీసుకునేలా పాకిస్తాన్ పై ఒత్తిడి పెట్టాలని భారత హోం మంత్రి పి.చిదంబరం అమెరికా విదేశాంగ మంత్రి హిల్లరీ క్లింటన్ ను కోరారు. ముంబై దాడుల నిందితుడు అజ్మల్ కసబ్ పై జరుగుతున్న విచారణను, తాను అరెస్టు చేసిన ఐదుగురిపై విచారణ జరపడంలో పాకిస్తాన్ అలసత్వాన్ని, సయీద్ ను స్వేచ్ఛగా వదిలేయడాన్ని తాను హిల్లరీ క్లింటన్ కు వివరించినట్లు చిదంబరం చెప్పారు. హిల్లరీతో చర్చల అనంతరం ఆయన మీడియా ప్రతినిధులతో మాట్లాడారు.

అది సరిపోతుందని తాను అనుకుంటున్నట్లు ఆయన తెలిపారు. ముంబై దాడుల తర్వాత భారత్ అనుసరించిన విధానాన్ని, పాకిస్తాన్ ను తాము సంప్రదించిన విషాయన్ని అమెరికా అర్థం చేసుకుంటుందని భావిస్తున్నానని ఆయన అన్నారు. సయీద్ పై సాక్ష్యాధారాలతో కూడిన ఐదు నివేదికలు ఇచ్చినప్పటికీ పాకిస్తాన్ సయీద్ ను వదిలివేయడాన్ని హిల్లరీకి వివరించినట్లు ఆయన చెప్పారు. సరిహద్దు గుండా పాకిస్తాన్ నుంచి భారత్ లోకి చొరబాట్ల పట్ల భారత్ ఆందోళన చెందుతోందని ఆయన చెప్పారు. పాకిస్తాన్ ను కేంద్రంగా చేసుకుని ఉగ్రవాదులు దాడులకు దిగే పరిస్థితి రూపుమాసిపోలేదని ఆయన అన్నారు.