ఆ ఎన్నికల తర్వాతే : విఠల్ రావు

హైదరాబాద్: మూడు రాష్ట్రాల ఎన్నికల తర్వాతనే ఆంధ్రప్రదేశ్ కొత్త ముఖ్యమంత్రి వ్యవహారంపై కాంగ్రెసు పార్టీ అధిష్ఠాన వర్గం నిర్ణయం తీసుకునే అవకాశం ఉంది. ఈ విషయం కాంగ్రెసు పార్లమెంటు సభ్యుడు విఠల్ రావు మాటల్లో వ్యక్తమైంది. ఆయన ఆదివారం కెవిపి రామచందర్ రావును కలుసుని ఢిల్లీ వ్యవహారాలను వివరించారు. తాము మూడు రాష్ట్రాల ఎన్నికల వ్యవహారంలో తీరిక లేకుండా ఉన్నామని, పొత్తుల వ్యవహారం తేల్చుకోవాల్సిన అవసరం ఉందని, సాధ్యమైనంత త్వరగా రాష్ట్ర వ్యవహారం తేలుస్తామని కేంద్ర మంత్రి ప్రణబ్ ముఖర్జీ తనతో చెప్పినట్లు విఠల్ రావు మీడియా ప్రతినిధులతో చెప్పారు. పార్టీ అధ్యక్షురాలు సోనియా గాంధీ తనకు తక్కువ సమయం ఇచ్చారని, అయితే సాధ్యమైనంత త్వరగా నాయకత్వ విషయాన్ని తేలుస్తామని చెప్పారని ఆయన అన్నారు. అధిష్ఠానం మనోగతాన్ని తాను కెవిపికి వివరించినట్లు ఆయన తెలిపారు.

శాసనసభ్యుడు శేషారెడ్డి కూడా కెవిపి రామచందర్ రావును కలిశారు. జగన్ ముఖ్యమంత్రి కావాలని తాము పార్టీ అధిష్ఠాన వర్గానికి చెప్పినట్లు ఆయన తెలిపారు. చరిష్మా, పరిపాలనా దక్షుడు అయిన జగన్ ను ముఖ్యమంత్రిని చేస్తే బాగుంటుందని తాము చెప్పినట్లు ఆయన తెలిపారు. పార్టీ అధిష్ఠాన వర్గం త్వరలో నిర్ణయం తీసుకుంటుందని భావిస్తున్నట్లు ఆయన తెలిపారు. అధిష్ఠాన వర్గానికి తమ మనోగతాన్ని, ప్రజాభిప్రాయాన్ని వినిపించడానికి మరోసారి రెండు మూడు రోజుల్లో ఢిల్లీకి వెళ్తామని ఆయన చెప్పారు.