రాజకీయం కేంద్రంగా కేశవరావు

హైదరాబాద్: కాంగ్రెసు వర్కింగ్ కమిటీ (సిడబ్ల్యుసి) సభ్యుడు, సీనియర్ కాంగ్రెసు నేత కె.కేశవరావు రాష్ట్ర కాంగ్రెసు రాజకీయాలకు కేంద్రంగా మారారు. ఆయన నివాసం కాంగ్రెసు నాయకుల సందర్శనతో సందడిగా మారింది. ఢిల్లీ నుంచి తిరిగి వచ్చిన తర్వాత ఆయన రోశయ్యతో చాలా సేపు సమావేశమయ్యారు. ఆయన పార్టీ అధిష్ఠాన వర్గం సందేశాన్ని రోశయ్యకు చేరవేసినట్లు సమాచారం. కేశవరావు రోశయ్య ప్రభుత్వానికి సమర్థమైనదిగా కితాబు ఇచ్చారు. ఆయన కలిసిన వెంటనే రోశయ్య వ్యవహార శైలిలో కూడా తేడా వచ్చినట్లు చెబుతున్నారు. ఈ నేపథ్యంలో రాష్ట్ర కాంగ్రెసు నాయకులు ఆయనను కలుసుకోవడం ప్రాధాన్యాన్ని సంతరించుకుంది.

కేశవరావు సీనియర్ కాంగ్రెసు శాసనసభ్యుడు జెసి దివాకర్ రెడ్డితో పాటు మంత్రులు వట్టి వసంత కుమార్, బొత్సా సత్యనారాయణ సోమవారం కలుసుకున్నారు. వట్టి వసంత కుమార్, బొత్సా సత్యనారాయణ దివంగత ముఖ్యమంత్రి వైయస్ రాజశేఖర రెడ్డికి అత్యంత సన్నిహితులు కావడం ఇక్కడ గమనార్హం. అలాగే మాజీ మంత్రి, సీనియర్ కాంగ్రెసు శాసనసభ్యుడు కె. జానారెడ్డి కూడా కేశవరావుతో సమావేశమయ్యారు. పార్టీ నేతలు తులసిరెడ్డి, కోదండరెడ్డి వంటివారు కూడా కేశవరావును కలుసుకున్నారు. తమ భేటీకి ప్రత్యేకంగా ప్రాధాన్యం లేదని వారు చెబుతున్నారు. అయితే నాయకులు కలుసుకున్నప్పుడు రాజకీయాలు చర్చకు రావడం పరిపాటి అని వారు వ్యాఖ్యానిస్తున్నారు. అంతకు మించి వారు మీడియాతో మాట్లాడడం లేదు.