జగన్ సిఎం అయినా సరే: టిడిపి

హైదరాబాద్: దివంగత కాంగ్రెసు నేత వైయస్ రాజశేఖర రెడ్డి తనయుడు వైయస్ జగన్మోహన్ రెడ్డి ముఖ్యమంత్రి అయినా తమకు అభ్యంతరం లేదని తెలుగుదేశం నాయకుడు నాగం జనార్దన్ రెడ్డి అన్నారు. తమకు ఎవరు ముఖ్యమంత్రి అయినా తమకు అభ్యంతరం లేదని, అది తమకు సంబంధించిన అంశం కాదని ఆయన సోమవారం మీడియా ప్రతినిధులతో అన్నారు. ప్రజలు స్వైన్ ఫ్లూ, డెంగ్యూ వ్యాధులతో మరణిస్తుంటే మంత్రులు రాజకీయాల్లో మునిగిపోతున్నారని ఆయన విమర్శించారు.

ఎవరు ముఖ్యమంత్రి అనేది తమకు సంబంధించిన అంశం కాదని, అది కాంగ్రెసు పార్టీ ఆంతరంగిక వ్యవహారమని తెలుగుదేశం నాయకులు కె. ఎర్రంనాయుడు, యనమల రామకృష్ణుడు అన్నారు. తెలుగుదేశం రాజకీయం చేస్తోందని కాంగ్రెసు చేసిన విమర్శలను వారు ఖండించారు. కాంగ్రెసు పార్టీయే శవరాజకీయాలు చేస్తోందని, వైయస్ రాజశేఖర రెడ్డి భౌతిక కాయం అక్కడ ఉండగానే తమకు మద్దతు ఇవ్వాలని కాంగ్రెసు నాయకులు ప్రజారాజ్యం అధినేత చిరంజీవిని కలిశారని వారన్నారు. తమను ఆ బురదలోకి లాగవద్దని వారు కాంగ్రెసు పార్టీకి సూచించారు. ప్రజలు కష్టాలు పడుతుంటే రాజకీయాల్లో మంత్రులు మునిగితేలుతున్నారని, ప్రజల కష్టాలు పట్టించుకోవాలని తాము మంత్రులను కోరుతున్నామని వారన్నారు.