త్వరలోనే సిఎల్పీ సమావేశం

హైదరాబాద్: త్వరలోనే కాంగ్రెసు లెజిస్లేచర్ పార్టీ (సిఎల్పీ) సమావేశం ఏర్పాటు చేస్తామని కాంగ్రెసు పార్టీ అధిష్టానం ముఖ్యమంత్రి కె.రోశయ్యకు చెప్పినట్లు సమాచారం. రాష్ట్ర పరిణామాలపై రోశయ్య పార్టీ జాతీయ నాయకులు అహ్మద్ పటేల్, ప్రణబ్ ముఖర్జీ, జైపాల్ రెడ్డికి చెప్పినట్లు సమాచారం. దీనికి వారు ఆ విధంగా ప్రతిస్పందించినట్లు తెలుస్తోంది. జగన్మోహన్ రెడ్డిని ముఖ్యమంత్రిని చేయాలనే డిమాండ్ పెద్ద యెత్తున మరోసారి ముందుకు రావడంతో రోశయ్య ఇరకాటంలో పడినట్లు కనిపిస్తోంది.

పలువురు శాసనసభ్యులు, మంత్రులు జగన్ ముఖ్యమంత్రి కావాలని డిమాండ్ చేస్తూ రాష్ట్రంలో ఆందోళనలు సాగుతున్నాయి. మంత్రి కొండా సురేఖ పదే పదే జగన్ ను ముఖ్యమంత్రిని చేయాలంటూ డిమాండ్ చేస్తున్నారు. సిఎల్పీ సమావేశం ఏర్పాటు చేయాలని ఆమె కోరుతున్నారు. రోశయ్య తాత్కాలిక ముఖ్యమంత్రి అనే అభిప్రాయం ప్రజల్లో, తమలో, ప్రతిపక్షాల్లో ఉందని, అందువల్ల అనుమానాలు తొలగిపోవాలంటే సిఎల్పీ సమావేశం ఏర్పాటు చేయాలని ఆమె అన్నారు.