ఎవరూ నన్ను కాదనడం లేదు: సిఎం

హైదరాబాద్: ముఖ్యమంత్రిగా తనను ఎవరూ కాదనడం లేదని, అయితే ముఖ్యమంత్రి పదవి విషయంలో వారి ప్రాధాన్యత వేరుగా ఉందని ముఖ్యమంత్రి కె. రోశయ్య అన్నారు. మంగళవారం మీట్ ది ప్రెస్ కార్యక్రమంలో మీడియా ప్రతినిధులు వేసిన ప్రశ్నకు ఆయన ఆ విధంగా సమాధానమిచ్చారు. ముఖ్యమంత్రి పదవికి కొంత మంది మంత్రులు, పార్టీ శాసనసభ్యులు తమ ప్రాధాన్యతను చెబుతున్నప్పటికీ పార్టీ అధిష్టానం నిర్ణయానికి కట్టుబడి ఉంటామని చెబుతున్నారని ఆయన అన్నారు. తమది జాతీయ పార్టీ అని, క్రమశిక్షణా రాహిత్యాన్ని తమ పార్టీ సహించదని, అన్ని విషయాలూ అధిష్టానానికి చేరుతున్నాయని ఆయన అన్నారు. అవసరమైనప్పుడు అధిష్టానం చర్యలు తీసుకుంటుందని ఆయన అన్నారు.

మంత్రులు తనకు సహకరించడం లేదనే మాటలో నిజం లేదని, మంత్రులు ఎవరి పనులు వారు చేసుకుపోతున్నారని, కుటుంబంలో పెద్ద వాడిగా వారికి తాను తోడు ఉంటున్నానని ఆయన అన్నారు. తనకు వచ్చిన సమాచారం ప్రకారం వైయస్ రాజశేఖర రెడ్డి హెలికాప్టర్ ప్రమాదం జరిగిందనేది ఆయన ఒక ప్రశ్నకు సమాధానంగా చెప్పారు. వైయస్ రాజశేఖర రెడ్డి విషయంలో కుట్ర జరిగి ఉంటే ఛేదించాల్సిన అవసరం ఉందని, వివిధ దర్యాప్తులు జరుగుతున్నాయని, విషయాలు తెలుస్తున్నాయని ఆయన అన్నారు. ముఖ్యమంత్రి ఎవరనేది ముఖ్యం కాదని, విధానాలు ఎలా సాగుతున్నాయనేది ముఖ్యమని ఆయన అన్నారు. విధానాల అమలులో లోపాలు లేకుండా చూసుకోవడమే ముఖ్యమని ఆయన అన్నారు. ముఖ్యమంత్రిగా తాను ఉన్నా, అధిష్టానం మరొకరిని పెట్టినా కాంగ్రెసు లక్ష్యం వైయస్ రాజశేఖర రెడ్డి సంక్షేమ, అభివృద్ధి కార్యక్రమాలను అమలు చేయడమేనని ఆయన అన్నారు.

తనకు ప్ర్తత్యేక ముద్ర లేదని, తనది కాంగ్రెసు ముద్ర అని, సోనియా ముద్ర అని ఆయన అన్నారు. పార్టీ అధిష్టానం చెప్పడం వల్లనే తాను ముఖ్యమంత్రిగా బాధ్యతలు నిర్వహిస్తున్నానని ఆయన అన్నారు. రాజశేఖర రెడ్డిని మళ్లీ తేలేమని, ఉన్నవారిమి శక్తిమేరకు పని చేయాలని, అధికారులు సమస్యలు పరిష్కరించడానికి ముందుకు సాగుతున్నారని ఆయన తీవ్రవాదం, వేర్పాటువాద సమస్యలు పెచ్చరిల్లుతున్నాయని ఒక మీడియా ప్రతినిధి చేసిన వ్యాఖ్యకు సమాధానంగా చెప్పారు. హైదరాబాద్ ను ఫ్రీజోన్ గా ప్రకటించడంపై సుప్రీంకోర్టులో రివ్యూ పిటిషన్ వేయాలని ప్రభుత్వం నిర్ణయం తీసుకుందని ఆయన అన్నారు. అఖిలపక్ష సమావేశంలోకి ఆగంతకుడి ప్రవేశంపై భద్రతా వైఫల్యమని అనుకోవడం లేదని ఆయన అన్నారు.