ఓబుళాపురంపై విచారణ: జగన్ కు ఉచ్చు

హైదరాబాద్: తమకు కొరకరాని కొయ్యగా మారిన కడప పార్లమెంటు సభ్యుడు వైయస్ జగన్ ను దారిలోకి తెచ్చుకునేందుకు కాంగ్రెసు అధిష్టానం ఒక్కొక్క చర్యనే చేపడుతోంది. ఆయన ఆదాయ మార్గాలపై కన్నేసిన అధిష్టానం వాటిని మూసేసే పనికి పూనుకున్నట్లు కనిపిస్తోంది. కర్నాటక మంత్రి గాలి జనార్దన్ రెడ్డికి చెందిన ఓబుళాపురం గనుల తవ్వకాలపై ముఖ్యమంత్రి కె. రోశయ్య ప్రభుత్వం విచారణకు ఆదేశించడం అందులో భాగమేనని అంటున్నారు. అనంతపురం జిల్లాలో నిబంధనలకు విరుద్ధంగా ఇనుప ఖనిజం తవ్వకాలను గాలి జనార్దన్ రెడ్డికి చెందిన ఓబుళాపురం మైనింగ్ జరుపుతోందనే ఆరోపణలపై ప్రభుత్వం ఈ విచారణకు ఆదేశించింది. ఓబుళాపురం ఖనిజ తవ్వకాల్లో జగన్ కు కూడా ఆదాయం సమకూరుతోందనే వార్తలు వచ్చిన విషయం తెలిసిందే.

గాలి జనార్దన్ రెడ్డికి, జగన్ కు మధ్య వ్యాపార లావాదేవీలున్నాయి. వైయస్ రాజశేఖర రెడ్డి ప్రభుత్వ హయాంలో కూడా ఓబుళాపురం గనుల తవ్వకాలపై తీవ్రమైన ఆరోపణలు వచ్చాయి. అయినా ఆయన గాలి జనార్దన్ రెడ్డికి బాసటగానే నిలిచారు. మైనింగ్ మాఫియా దేశానికి ప్రమాదకరంగా పరిణమించిందనే విమర్శలు దేశవ్యాప్తంగా వెల్లువెత్తుతున్నాయి. కర్నాటకలో యెడ్యూరప్ప ప్రభుత్వాన్ని కూల్చడానికి గాలి జనార్దన్ రెడ్డి, ఆంధ్రప్రదేశ్ లో అధికారం చేజిక్కించుకోవడానికి జగన్ వర్గం ప్రయత్నాలు చేయడం, ఆయా పార్టీల కేంద్ర నాయకత్వాలకే సవాల్ విసిరిని వైనం తీవ్ర దుమారమే రేపింది. ఈ నేపథ్యంలో రాష్ట్ర ప్రభుత్వం ఓబుళాపురం గనుల తవ్వకాలపై వేటు వేస్తోంది. ఓబుళాపురం తవ్వకాలపై పది రోజుల్లోగా నివేదిక సమర్పించాలని కమిటీలకు ముఖ్యమంత్రి ఆదేశాలు జారీ చేశారు.