ఎనాటికైనా సిఎంను అవుతా: జగన్

కడప: కడప పార్లమెంటు సభ్యుడు వైయస్ జగన్ బుధవారం సంచలన ప్రకటన చేశారు. ఎనాటికైనా తాను ముఖ్యమంత్రిగా ప్రజల ముందుకు వస్తానని ఆయన అన్నారు. తమకు మంచి రోజులు వస్తాయని, తాము ముఖ్యమంత్రి అవుతానని ఆయన అన్నారు. డా. వైయస్సార్ అభయహస్తం పథకం పత్రాలు, రుణాల పంపిణీ కార్యక్రమంలో ఆయన బుధవారంనాడు తన మనసులోని మాటను వెల్లడించారు. తమ మనోభావాలు కాంగ్రెస్ అధ్యక్షురాలు సోనియా గాంధీకి తెలుసునని ఆయన అన్నారు. దేవుడు కరుణిస్తాడని, మంచి రోజులు వస్తాయని ఆయన అన్నారు. ఈ రాష్ట్ర ముఖ్యమంత్రి స్థానంలో, మీ చిన్న తమ్ముడిగా మీ ముందుకొస్తానని ఆయన ప్రజలనుద్దేశించి అన్నారు.

తాము ముఖ్యమంత్రి కావడం ఈ ఏడాది కాకపోవచ్చునని, రెండేళ్ల తర్వాతనైనా కాకపోవచ్చునని, వయసు తనకు తోడుగా ఉందని, ప్రజల దీవెనలూ ఆశీస్సులూ ఉన్నాయని, ఇంకెవరూ తనను ఆపలేరని ఆయన అన్నారు. ప్రజల మోములో చిరునవ్వు తన తండ్రి పరితపించారని, తాను బతికి ఉన్నన్నాళ్లు ఆ చిరునవ్వులు చూడడానికే శ్రమిస్తానని వాగ్దానం చేస్తున్నానని ఆయన అన్నారు. తమ తండ్రి వైయస్ రాజశేఖర రెడ్డి చేపట్టిన కార్యక్రమాలను ఆయన ప్రస్తావించారు. తెలుగుదేశం పార్టీ అధ్యక్షుడు నారా చంద్రబాబు నాయుడిపై విమర్శలు చేశారు.