సోనియా పిలిస్తే ఢిల్లీ వస్తా: కె చంద్రశేఖర రావు

హైదరాబాద్: తెలంగాణ అంశంపై చర్చలకు కాంగ్రెసు అధ్యక్షురాలు సోనియా గాంధీ పిలిస్తే తాను ఢిల్లీకి వస్తానని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చెప్పారు. నిమ్స్ లో చికిత్స పొందుతున్న కెసిఆర్ ను తెలంగాణ కాంగ్రెసు సీనియర్లు గురువారంనాడు పరామర్శించారు. ఈ సందర్భంగా కెసిఆర్ ఆ విషయం చెప్పినట్లు కాంగ్రెసు సీనియర్ నాయకులు అమోస్, పురుషోత్తమరావు తదితరులు మీడియా ప్రతినిధులతో చెప్పారు. త్వరలోనే కాంగ్రెసు అధిష్టానం అందుకు సిద్ధపడుతుందని వారు చెప్పారు. కెసిఆర్ దీక్ష విరమణకు సమయం రావాలని, అది త్వరలోనే వస్తుందని వారన్నారు. కాంగ్రెసు వైఖరి పట్ల కెసిఆర్ వ్యతిరేకంగా లేరని, తమ వైఖరి పట్ల కెసిఆర్ సంతృప్తి వ్యక్తం చేశారని వారు ఒక ప్రశ్నకు సమాధానంగా చెప్పారు.

సోనియా గాంధీ వద్దకు తమతో పాటు వస్తానని కెసిఆర్ చెప్పినట్లు వారు తెలిపారు. కెసిఆర్ ఆరోగ్యం పట్ల తమ పట్టింపును తెలియజేసినట్లు వారు తెలిపారు. దీక్ష కొనసాగింపుపై ఆలోచించాలని తాము కెసిఆర్ కు సూచించామని వారు చెప్పారు. తెలంగాణ ఉద్యమం 1969లో కన్నా ఉధృతంగా ఉందని, ఈ విషయంలో తమకు వేరే అభిప్రాయం లేదని వారన్నారు. ఇప్పటికే తాము ఢిల్లీ నాయకులతో మాట్లాడామని వారు చెప్పారు. తెలంగాణ అంశంపై తాము చేయాల్సింది చేస్తున్నామని వారు చెప్పారు. తమతో సహకరించడానికి కెసిఆర్ సిద్ధంగా ఉన్నారని వారు చెప్పారు.

కెసిఆర్ నిమ్స్ ఆస్పత్రిలో బిజెపి రాష్ట్రాధ్యక్షుడు బండారు దత్తాత్రేయ కూడా పరామర్శించారు. నిమ్స్ వద్ద తెరాస శ్రేణులు పెద్ద యెత్తున మోహరించాయి. పోలీసులు కట్టుదిట్టమైన ఏర్పాట్లు చేశారు. నిమ్స్ నుంచి గ్రేహౌండ్స్ పోలీసులు వెళ్లిపోవాలని తెరాస కార్యకర్తలు డిమాండ్ చేశారు. తెలుగుదేశం పార్టీ అధ్యక్షుడు నారా చంద్రబాబు నాయుడు కెసిఆర్ కు ఫోన్ చేసి మాట్లాడారు.