సమైక్యాంధ్ర నినాదాలతో దద్దరిల్లిన విశాఖ నగరం

విశాఖపట్నం: తెలుగు మాట్లాడే వారంతా ఒక్కటేనని, సమైక్యాంధ్ర వర్ధిల్లాలని నినదిస్తూ ఆంధ్ర విశ్వవిద్యాలయం విద్యార్థులు ర్యాలీ నిర్వహించారు. తెలంగాణ కోసం జరుగుతున్న హింసాత్మక ఆందోళనను నిరసించారు. సమైక్యాంధ్ర కోరుతూ సోమవారం తరగతులను బహిష్కరించారు. అనంతరం ఏయూ ఆర్ట్స్‌ కళాశాల నుంచి భారీ ర్యాలీగా తరలివెళ్లి కలెక్టరేట్‌ ఎదుట బైఠాయించి తమ నిరసన తెలిపారు. ఆర్ట్స్‌, సైన్స్‌ కళాశాలలకు చెందిన సుమారు వెయ్యి మందికి పైగా విద్యార్థులు ఈ ర్యాలీలో పాల్గొన్నారు.

సిరిపురం జంక్షన్‌, జగదాంబ జంక్షన్‌లలో మానవహారాలుగా ఏర్పడి 'తెలుగువారంతా ఒక్కటే', 'తెలంగాణ వద్దు...సమైక్యాంధ్రే ముద్దు' అంటూ నినాదాలు చేశారు. సిరిపురం జంక్షన్‌లో ద్రోణంరాజు సత్యనారాయణ విగ్రహం వద్ద పెద్దపెట్టున నినాదాలు చేశారు. అక్కడ నుంచి సర్య్కూట్‌ హౌస్‌, రామ్‌నగర్‌ రోడ్‌ మీదుగా జగదాంబ జంక్షన్‌కు చేరుకుని మరోసారి మానవహారం గా ఏర్పడి సమైక్యాంధ్ర కోసం నినాదాలు చేశారు. అటు నుంచి కేజీహెచ్‌ మీదుగా ర్యాలీగా వెళ్లి కలెక్టరేట్‌ ఎదుట బైఠాయించారు.