తెలంగాణ ప్రక్రియ ప్రారంభమైంది: జికె పిళ్ల

న్యూఢిల్లీ/హైదరాబాద్: తెలంగాణ రాష్ట్ర ఏర్పాటు ప్రక్రియ ప్రారంభమైందని కేంద్ర హోం శాఖ కార్యదర్శి జికె పిళ్లై ప్రకటించారు. తెలంగాణ రాజధాని హైదరాబాదే ఉంటుందని ఆయన శుక్రవారం మీడియా ప్రతినిధులతో అన్నారు. ప్రజలు అర్థం చేసుకుంటారని, ఆందోళనలు తగ్గుతాయని, తెలంగాణ రాష్ట్ర ఏర్పడుతుందని ఆయన అన్నారు. కేంద్ర హోం మంత్రి చిదంబరం రాష్ట్ర ఏర్పాటుకు ప్రక్రియ ప్రారంభించాలని సూచించారని, అన్ని పార్టీలతో సంప్రదింపులు జరుగుతున్నాయని, వెంటనే రాష్ట్రం ఏర్పడుతుందని ఆయన అన్నారు.

ఇన్నేళ్లు కలిసి ఉండి ఒక్కసారిగా విడిపోవాలంటే ఎవరికైనా బాధగానే ఉంటుందని ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ హైదరాబాదులో మీడియా ప్రతినిధులతో అన్నారు. రోశయ్య ప్రభుత్వానికి పడగొట్టడానికి పరిణామాలు చోటు చేసుకున్నాయనే మాటలో అర్థం లేదని ఆయన అన్నారు. పిసిసి అధ్యక్షుడిగా అన్ని ప్రాంతాల గురించి ఆలోచించాల్సి ఉంటుందని ఆయన అన్నారు. తెలంగాణ ఏర్పాటుకు ప్రభుత్వ నిర్ణయం హఠాత్తుగా వెలువడింది కాదని, నలబై ఏళ్లుగా ఉద్యమం సాగుతోందని ఆయన అన్నారు.