రామోజీ రావు తెలంగాణ జపం?

హైదరాబాద్: ఈనాడు దిన పత్రిక అధినేత రామోజీ రావు తెలంగాణ రాష్ట్ర ఏర్పాటును సమర్థిస్తున్నట్లు సమాచారం. తెలంగాణ రాష్ట్ర ఏర్పాటును తాను స్వాగతిస్తున్నానని ఆయన సంస్థల ఉద్యోగులతో చెబుతున్నట్లు తెలుస్తోంది. తన ఆస్తులన్నీ తెలంగాణలోనే ఉన్నాయని, తనకు ఆంధ్రలో ఉన్నదేమీ లేదని, అందువల్ల తాను తెలంగాణను బలపరుస్తున్నట్లు ఆయన చెబుతున్నట్లు వినికిడి. సాక్షి దినపత్రిక యజమాని, కడప పార్లమెంటు సభ్యుడు వైయస్ జగన్ కు వ్యతిరేకంగా, కాంగ్రెసు వ్యతిరేకతతో ఈనాడు దినపత్రికలో తెలంగాణ వార్తాకథనాలు ఎక్కువ వస్తున్నట్లు ప్రచారం సాగుతోంది.

నిజానికి, తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుకు రామోజీ ఎప్పుడో మద్దతు పలికినట్లు చెబుతున్నారు. ఎన్నికల్లో తెలుగుదేశం పార్టీకి, తెరాసకు మధ్య పొత్తు కుదర్చింది కూడా ఆయన అంటారు. ఇటీవల అసైన్డ్ భూముల ఆక్రమణ వివాదం ముందుకు వచ్చినప్పుడు రామోజీకి మద్దతుగా కెసిఆర్ మాట్లాడారు. రామోజీ ఫిల్స్ సిటీని కూడా కెసిఆర్ నిరాహార దీక్షకు ముందు మీడియా ప్రతినిధుల సమావేశంలో ప్రశంసించారు. ఎంతో శ్రమకోర్చిన ప్రపంచ ప్రశంసలందుకునే రీతిలో రామోజీ దాన్ని నిర్మించారని కెసిఆర్ అన్నారు. రామోజీ ఫిల్మ్ సిటీలో ఆసైన్డ్ భూములున్నాయని తాను అనలేదని, ఫిల్స్ సిటీని నాగళ్లతో దున్నుతామని తాను అనలేదని కెసిఆర్ వివరణ ఇచ్చుకున్నారు.