కెసిఆర్ కు అమెరికా టిడిఎఫ్ కృతజ్ఝతలు

హైదరాబాద్: తెలంగాణ రాష్ట్ర ఏర్పాటు కోసం తెంలగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు చూపిన నిబద్ధతకు అమెరికాలోని తెలంగాణ డెవలప్ మెంట్ ఫోరం (టిడిఎఫ్) కృతజ్ఞతలు తెలిపింది. టిడిఎఫ్ అధ్యక్షుడు పుట్టా విప్లవ రెడ్డి ఈ మేరకు ఒక ప్రకటన విడుదల చేశారు. తెలంగాణ రాష్ట్ర ఏర్పాటు కోసం ఉద్యమించిన విద్యార్థులకు, యువకులకు, నాయకులకు కూడా ఆయన కృతజ్ఞతలు తెలిపారు. తెలంగాణ సమస్యకు శాంతియుత పరిష్కార సాధనలో తోడ్పడిన మీడియాకు ఆయన కృతజ్ఞతలు తెలిపారు.

ప్రస్తుత తెలగాణ ఉద్యమంలో ప్రాణాలు కోల్పోయిన 29 మంది, 1969 ఉద్యమంలో మరణించినవారి కోసం అంతర్జాతీయ స్థాయిలో స్మారకాన్ని ఏర్పాటు చేస్తామని ఆయన చెప్పారు. తెలంగాణ అభివృద్ధి కోసం సాంకేతిక నైపుణ్యాన్ని, పెట్టుబడులను అందిస్తామని ఆయన చెప్పారు. స్పష్టమైన దృక్పథంతో తెలంగాణ పునర్నిర్మాణానికి పారదర్శకంగా రూపొందించే విధానాన్ని తాము ఆహ్వానిస్తామని ఆయన చెప్పారు.