విజయవాడలో డిఎస్ ను గెలిపిస్తాం: లగడపాటి

విజయవాడ: ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్ ను విజయవాడలో లోకసభ అభ్యర్థిగా నిలబెడితే గెలిపించుకుని తీసుకు వస్తామని కాంగ్రెసు పార్లమెంటు సభ్యుడు లగడపాటి రాజగోపాల్ అన్నారు. విశాల భావాలున్న విజయవాడలో తెలంగాణ నాయకులను ఎవరిని పెట్టినా గెలిపిస్తామని, ఆ రకంగా తాము సమైక్యవాదులమని నిరూపించుకుంటామని ఆయన చెప్పారు. తెలంగాణ రాష్ట్ర ఏర్పాటుకు ప్రక్రియను ప్రారంభించినట్లు కేంద్ర హోం మంత్రి పి. చిదంబరం చేసిన ప్రకటనకు నిరసనగా లగడపాటి రాజగోపాల్ తన లోకసభ సభ్యత్వానికి రాజీనామా చేసిన విషయం తెలిసిందే. తన రాజీనామా లేఖను నేరుగా లోకసభ స్పీకర్ మీరా కుమార్ కు అందజేశారు.

తన రాజీనామాను వెంటనే ఆమోదింపజేయాలని లగడపాటి రాజగోపాల్ కాంగ్రెసు అధ్యక్షురాలు సోనియా గాంధీని కోరారు. ఈ మేరకు ఆయన సోనియాకు శనివారం ఒక లేఖ రాశారు. లగడపాటి రాజగోపాల్ సోమవారంనాడు విజయవాడ నుంచి హైదరాబాద్ వస్తున్నారు. వెంటనే ఆయన ముఖ్యమంత్రి రోశయ్యతో భేటీ అవుతారు.