నేడు ఆమోదయోగ్యమైన నిర్ణయం: ఆంటోనీ

న్యూఢిల్లీ: తెలంగాణ విషయంలో అందరికీ ఆమోదయోగ్యమైన నిర్ణయం వెల్లడిస్తామని కేంద్ర మంత్రి, కాంగ్రెసు సీనియర్ నేత ఎకె ఆంటోనీ చెప్పారు. ఈ సాయంత్రమే అందరికీ ఆమోదయోగ్యమైన నిర్ణయం వెలువడుతుందని ఆయన సోమవారం మీడియా ప్రతినిధులతో చెప్పారు. తెలంగాణ రాష్ట్ర ఏర్పాటును కోస్తాంధ్ర, రాయలసీమ ప్రజాప్రతినిధులు వ్యతిరేకిస్తున్న నేపథ్యంలో కాంగ్రెసు అధిష్టానంలో కదలిక వచ్చింది. తెలంగాణ రాష్ట్ర ఏర్పాటు ప్రక్రియ ప్రారంభమైందని కేంద్ర హోం మంత్రి పి.చిదంబరం ప్రకటించిన మర్నాటి నుంచి కాంగ్రెసు పార్లమెంటు సభ్యులు దానికి వ్యతిరేకంగా ఢిల్లీలో లాబీయింగ్ చేస్తున్నారు.

అప్పటి నుంచి వారు పార్టీ అధిష్టానానికి చెందిన ప్రణబ్ ముఖర్జీ, వీరప్ప మొయిలీ, అహ్మద్ పటేల్ లను కలుస్తూనే ఉన్నారు. ప్రధాని డాక్ట్రర్ మన్మోహన్ సింగ్ తో కూడా సమావేశమయ్యారు. తాజాగా సోమవారం 20 మంది పార్లమెంటు సభ్యులు కేంద్ర ప్రణబ్ ముఖర్జీతో మాట్లాడారు. తెలంగాణపై శాసనసభలో తీర్మానం పెడితేనే పార్లమెంటులో బిల్లు పెడతామని ప్రణబ్ ముఖర్జీ తమతో చెప్పినట్లు ఎంపీల ప్రతినిధి బృందానికి నాయకత్వం వహిస్తున్న ఏలూరు కాంగ్రెసు పార్లమెంటు సభ్యుడు కావూరి సాంబశివరావు చెప్పారు.