ఆంధ్ర, సీమ ఎమ్మెల్యేలతో లగడపాటి రాజగోపాల్ భేటీ

హైదరాబాద్‌: ఆంధ్ర, రాయలసీమ ఎమ్మెల్యేలతో విజయవాడ కాంగ్రెస్ ఎంపీ లగడపాటి రాజగోపాల్‌ ఈరోజు మధ్యాహ్నం సమావేశమయ్యారు. అసెంబ్లీ నిరవధికంగా వాయిదాపడిన నేపథ్యంలో భవిష్యత్‌ కార్యాచరణపై వారు చర్చించారు. ఈ భేటీకి ఆ ప్రాంత ప్రరాపా ఎమ్మెల్యేలు కూడా హాజరయ్యారు. సమైక్యాంధ్ర ఉద్యమానికి రాజగోపాల్ కేంద్ర బిందువుగా మారిన విషయం తెలిసిందే.

ఇప్పుడు తెలంగాణ ప్రాంతానికి చెందిన అన్ని పార్టీల ప్రజాప్రతినిధులు (వామపక్షాలు, ప్రజారాజ్యం మినహా) ఒక వర్గంగా, ఆంధ్ర ప్రాంతానికి చెందిన ప్రజాప్రతినిధులు మరో వర్గంగా దాదాపు చీలిపోయినట్టు కన్పిస్తోంది. ఇప్పుడు కేంద్రం ఒక నిర్ణయం తీసుకోవడం చాలా కష్టంగా మారుతుంది. ఎందుకంటే జైపాల్ రెడ్డితో సహా తెలంగాణ కాంగ్రెస్ నాయకులంతా తెలంగాణ రాష్ట్రాన్ని బాహాటంగా సమర్ధించారు. చిదంబరం ప్రకటన చేసిన రోజు వారంతా కెసీఅర్ విజయం సాధించినట్టు బహిరంగంగా ప్రకటించారు.