వైయస్ జగన్ టిడిపితో కలిశారు: సర్వే

న్యూఢిల్లీ: తమ పార్టీ కడప పార్లమెంటు సభ్యుడు తెలుగుదేశం పార్టీతో చేతులు కలిపారని కాంగ్రెసు తెలంగాణ పార్లమెంటు సభ్యుడు సర్వే సత్యనారాయణ ఆరోపించారు. లోకసభలో తెలుగుదేశం సభ్యులతో కలిసి జగన్ సమైక్యాంధ్ర నినాదం చేశారని, సమైక్యాంధ్ర నినాదంతో గొడవ చేసిన తెలుగుదేశం సభ్యులతో చేతులు కలిపారని, వారిని అభినందించారని ఆయన మీడియా ప్రతినిధులతో అన్నారు. ఆ రకంగా జగన్ పార్టీని, ప్రభుత్వ నిర్ణయాన్ని ధిక్కరించారని ఆయన విమర్శించారు. జగన్ పార్టీ క్రమశిక్షణను ఉల్లంఘించారని ఆయన అన్నారు. జగన్ పై చర్య తీసుకోవాలని ఆయన పార్టీ నాయకత్వాన్ని కోరారు. తెలంగాణపై తీసుకున్న నిర్ణయాన్ని తమ పార్టీ అధ్యక్షురాలు సోనియా గాంధీ వెనక్కి తీసుకోరని ఆయన అన్నారు.

తెలుగుదేశం పార్టీతో కలిసి తమ పార్టీకి, ప్రభుత్వానికి చెడ్డ పేరు తేవాలని జగన్ ప్రయత్నించారని సర్వే అన్నారు. జగన్ వ్యవహార శైలి వల్ల తాము బాధ పడ్డామని కరీంనగర్ పార్లమెంటు సభ్యుడు పొన్నం ప్రభాకర్ అన్నారు. తమకు దివంగత నేత వైయస్ రాజశేఖర రెడ్డిపై ఆప్యాయత, ప్రేమ ఉన్నాయని, జగన్ ఆ రకంగా వ్యవహరించడం తమకు బాధ కలిగించిందని ఆయన అన్నారు. జగన్ ముఖ్యమంత్రి కావాలని తాము కోరుకున్నామని, కానీ తాము ప్రత్యేక తెలంగాణను కోరుకుంటున్నామని భువనగిరి పార్లమెంటు సభ్యుడు రాజగోపాల్ రెడ్డి అన్నారు. జగన్ కావాలని అలా చేసి ఉండరని ఆయన సమర్థించే ప్రయత్నం చేశారు.