లగడపాటి దీక్షను తప్పు పట్టిన జెసి

హైదరాబాద్: తమ పార్టీ పార్లమెంటు సభ్యుడు లగడపాటి రాజగోపాల్ నిరాహార దీక్షను కొనసాగించడాన్ని కాంగ్రెసు సీనియర్ శాసనసభ్యుడు జెసి దివాకర్ రెడ్డి తప్పు పట్టారు. సర్దుబాటు చేస్తామని పార్టీ అధిష్టానం హామీ ఇచ్చిన తర్వాత కూడా లగడపాటి దీక్ష కొనసాగించడం సరైంది కాదని ఆయన మంగళవారం మీడియా ప్రతినిధులతో అన్నారు. తాము స్పీకర్ కిరణ్ కుమార్ రెడ్డికి రాజీనామాలు సమర్పించామని, నిర్ణయం స్పీకరుదేనని ఆయన అన్నారు.

ఆందోళనలు విరమించాలని ఆయన విద్యార్థులను కోరారు. ఆస్తినష్టం, ప్రాణ నష్టం జరగకుండా చూడాలని ఆయన ఆందోళనకారులను కోరారు. విద్యార్థులు సమైక్యాంధ్ర వివాదాన్ని రాజకీయ నాయకులకు వదిలేయాలని ఆయన సూచించారు. తమ సమైక్యాంధ్ర డిమాండ్ పై పార్టీ అధిష్టానం సానుకూలంగా ప్రతిస్పందించిందని ఆయన అన్నారు. నేడు తమకు అనుకూలంగా అధిష్టానం ప్రకటనలు చేసిందని ఆయన ఒక ప్రశ్నకు సమాధానంగా చెప్పారు.