అన్నీ సర్దుకుంటాయి: జగన్ తో సోనియా

న్యూఢిల్లీ: ఆంధ్రప్రదేశ్ రాష్ట్రంలో అన్నీ సర్దుకుంటాయని కాంగ్రెసు అధ్యక్షురాలు సోనియా గాంధీ కడప పార్లమెంటు సభ్యుడు వైయస్ జగన్ తో అన్నారు. రాయలసీమ, కోస్తాంధ్ర పార్లమెంటు సభ్యులతో కలిసి ఆయన మంగళవారం పార్లమెంటు ఆవరణలో సోనియాను కలిశారు. రాష్ట్రంలోని తాజా పరిణామాలను, తమ పార్టీ పార్లమెంటు సభ్యుడు లగడపాటి రాజగోపాల్ దీక్షను ఆయన సోనియా దృష్టికి తీసికెళ్లారు. రాష్ట్రంలో అన్నీ సర్దుకుంటాయని సోనియా జగన్ తో అన్నారు.

లోకసభలో సమైక్యాంధ్ర, తెలంగాణ నినాదాలు చేసిన తెలుగుదేశం పార్లమెంటు సభ్యులను వైయస్ జగన్ అభినందించడాన్ని కాంగ్రెసు ఎంపీల ఫోరం కన్వీనర్ పొన్నం ప్రభాకర్ తప్పు పట్టారు. కాగా, కాంగ్రెసు పార్లమెంటు సభ్యులు మందా జగన్నాథం, అనంత వెంకట్రామిరెడ్డికి మధ్య వాగ్వివాదం చెలరేగింది. తెలంగాణ అంశం మంగళవారం లోకసభలో దుమారం రేపిన విషయం తెలిసిందే. తెలంగాణ అంశాన్ని బిజెపి సభ్యుడు వెంకయ్యనాయుడు రాజ్యసభలో ప్రస్తావించారు.