ప్రకటన వచ్చే వరకు దీక్ష కొనసాగుతుంది: లగడపాటి

విజయవాడ: సమైక్యాంధ్రప్రదేశ్ కు అనుకూలంగా కేంద్రం నుంచి ప్రకటన వచ్చే వరకు తన దీక్ష కొనసాగుతుందని కాంగ్రెసు పార్లమెంటు సభ్యుడు లగడపాటి రాజగోపాల్ చెప్పారు. ఆయన నిరవధిక నిరాహార దీక్ష బుధవారానికి మూడో రోజుకు చేరుకుంది. హైదారాబాదులోని ఫలక్ నుమా పోలీసు స్టేషన్ లో ఆయన తన దీక్షను ప్రారంభించారు. రాష్ట్ర పరిణామాలను కేంద్ర అర్థం చేసుకుంటుందని తాను అనుకుంటున్నట్లు ఆయన తెలిపారు. తమది ప్రజల పోరాటమని ఆయన అన్నారు. ప్రజలకు అవగాహన కల్పించడానికే తాను దీక్ష సాగిస్తున్నట్లు ఆయన తెలిపారు.

ఆంధ్రప్రదేశ్ పెద్ద రాష్ట్రమైనందుననే ఇక్కడి పరిణామాల పట్ల ఆందోళన చెంది ప్రధాని మన్మోహన్ సింగ్ ప్రకటన చేశారని ఆయన అభిప్రాయపడ్డారు. ఇంత పెద్ద రాష్ట్రం కాబట్టే ప్రధాని అంత ఆందోళన చెందుతున్నారని ఆయన అన్నారు. రాష్టాన్ని ముక్కలు చెక్కలు చేయవద్దని ఆయన కోరారు. ఇదే రీతిలో సమైక్యాంధ్ర ఉద్యమం సాగాల్సి ఉందని ఆయన అన్నారు. తమ ఉద్యమం శాంతియుతంగా సాగుతుందని ఆయన చెప్పారు.