తెలంగాణకే కట్టుబడి ఉన్నాం: నాగం జనార్దన్ రెడ్డి

హైదరాబాద్: తాము తెలంగాణ రాష్ట్ర ఏర్పాటుకు కట్టుబడి ఉన్నామని తెలుగుదేశం పార్టీ నాయకుడు నాగం జనార్దన్ రెడ్డి స్పష్టం చేశారు. తమ పార్టీకి చెందిన మెదక్, మహబూబ్ నగర్, హైదరాబాద్, రంగారెడ్డి, ఖమ్మం జిల్లాల కమిటీలు సమైక్యాంధ్రను బలపరుస్తూ నిర్ణయం చేస్తాయని వచ్చిన వార్తల్లో నిజం లేదని, అవి పుకార్లు మాత్రమేనని ఆయన బుధవారం మీడియా ప్రతినిధుల సమావేశంలో అన్నారు. తమ పార్టీ తెలంగాణ శాసనసభ్యులు, ఎమ్మెల్సీలు, నాయకులు తెలంగాణ రాష్ట్ర ఏర్పాటును సమర్థిస్తున్నట్లు, పార్టీ తెలంగాణకు కట్టుబడి ఉన్నట్లు ఆయన తెలిపారు. తెలంగాణ ఏర్పాటుకు శాసనసభలో తీర్మానం ప్రతిపాదిస్తే తాము బలపరుస్తామని కూడా ఆయన చెప్పారు.

సమైక్యవాదులను బలపరిచే ఉద్దేశం తమకు ఏ మాత్రం లేదని ఆయన చెప్పారు. ఈ మీడియా ప్రతినిధుల సమావేశంలో పార్టీ తెలంగాణ నాయకులు టి. దేవేందర్ గౌడ్, మండవ వెంకటేశ్వర రావు, మోత్కుపల్లి నర్సింహులు తదితరులు కూడా పాల్గొన్నారు. దేవేందర్ గౌడ్, నాగం జనార్దన్ రెడ్డి వంటి నాయకులు సమైక్యాంధ్రకు మద్దతు పలుకుతున్నట్లు కూడా వార్తలు వచ్చాయి. కానీ ఆ వార్తల్లో నిజం లేదని వీరి ప్రకటనను బట్టి తెలుస్తోంది.