తెలంగాణపై బాబు మారలేదు: ఎర్రబెల్లి

హైదరాబాద్: తెలంగాణపై తమ పార్టీ అధ్యక్షుడు నారా చంద్రబాబు నాయుడి వైఖరి మారలేదని తెలుగుదేశం పార్టీ నాయకుడు, శాసనసభ్యుడు ఎర్రబెల్లి దయాకర్ రావు రావు చెప్పారు. తెలంగాణకు చెందని తెలుగుదేశం నాయకులు సోమవారం తమ పార్టీ అధ్యక్షుడు చంద్రబాబుతో సమావేశమయ్యారు. ఈ సమావేశానంతరం దయాకర రావు మీడియా ప్రతినిధులతో మాట్లాడారు. చంద్రబాబు తెలంగాణకు అనుకూలంగానే ఉన్నారని ఆయన చెప్పారు.

ఉస్మానియా విశ్వవిద్యాలయంలో తమ పార్టీ నాయకుడు నాగం జనార్దన్ రెడ్డిపై జరిగిన దాడికి నిరసనగా రాజకీయ పార్టీలు, ప్రజా సంఘాల సంయుక్త కార్యాచరణ కమిటీ (జెఎసి)లో చేరడానికి తెలుగుదేశం పార్టీ నాయకులు మొరాయించారు. జెఎసి కన్వీనర్ కోదండరామ్ చేసిన విజ్ఝప్తి మేరకు అందులో చేరడానికి వారు అంగీకరించారు. ఆదివారం రాత్రి జరిగిన జెఎసి సమావేశంలో వారు పాల్గొన్నారు. జెఎసి సమావేశం వివరాలను తెలంగాణ నాయకులు తమ నేత చంద్రబాబుకు వివరించారు.