చిరంజీవి తెలంగాణ ద్రోహి: ప్రజా తెలంగాణ సమితి

వరంగల్: ప్రజారాజ్యం అధ్యక్షుడు చిరంజీవి తెలంగాణ ద్రోహి అని ప్రజా తెలంగాణ సమితి (పీటీఎస్‌) నేతలు విమర్శించారు. సామాజిక తెలంగాణే లక్ష్యంగా తమ సమితి ఆవిర్భవించిందని చెప్పారు. శ్రీనివాస ట్రస్ట్‌క్లబ్‌లో ఆదివారం ఏర్పాటు చేసిన విలేకరుల సమావేశంలో పీటీఎస్‌ రాజకీయ వ్యవహారాల కమిటీ సభ్యుడు డాక్టర్‌ రాజమౌళి మాట్లాడారు. ఆరు దశాబ్దాల తెలంగాణ రాష్ట్ర ఉద్యమంలో ఎందరో ద్రోహులు పుట్టుకొచ్చారని, చిరంజీవి కూడా ప్రస్తుతం అలాగే వ్యవహరిస్తున్నారని విమర్శించారు. తెలంగాణ సాధన కోసం కలిసొచ్చే అన్ని పార్టీలు, శక్తులతో ఐక్యంగా ఉద్యమిస్తామన్నారు. జిల్లాలో పార్టీని పటిష్టం చేసేందుకు చర్యలు చేపడుతున్నట్లు తెలిపారు.

రాష్ట్ర ఉపాధ్యక్షుడు ఎం.డి.రియాజ్‌ మాట్లాడుతూ తెలంగాణ ప్రాంతంలో చిరంజీవిని తిరుగనివ్వకుండా అడ్డుకుంటామని చెప్పారు. తెలంగాణ బిడ్డలుగా ఈ ఉద్యమాన్ని ముందుకు తీసుకెళతామన్నారు. రాష్ట్ర ప్రధాన కార్యదర్శి సి.హెచ్‌.రాజారెడ్డి మాట్లాడుతూ తెలంగాణలోని 10 జిల్లాల్లో పార్టీ నాయకులు, కార్యకర్తల సమష్టి నిర్ణయం మేరకే పీటీఎస్‌ ఆవిర్భవించిందని చెప్పారు. మిగత పార్టీల్లా భౌగోళిక తెలగాణకే పరిమితం కాకుండా సామాజిక తెలంగాణ లక్ష్యంగా ఉద్యమిస్తామని పేర్కొన్నారు. జిల్లా అధ్యక్షుడు బానోతు శంకర్‌నాయక్‌ మాట్లాడుతూ సామాజిక న్యాయం, సామాజిక తెలంగాణ అంశాలకు ఆకర్షితులై ఎందరో పీఆర్పీలో చేరితే సమైక్యనినాదం ఎత్తుకుని చిరంజీవి ద్రోహం చేశారని విమర్శించారు.