రాజీనామాలపై స్పీకర్ పై ఒత్తిడి: నాగం

హైదరాబాద్: తెలంగాణ ప్రాంతానికి చెందిన శాసనసభ్యుల రాజీనామాలను ఆమోదించాలని శాసనసభ స్పీకర్ పై ఒత్తిడి తేనున్నట్లు తెలుగుదేశం పార్టీ తెంలగాణ నాయకుడు నాగం జనార్దన్ రెడ్డి చెప్పారు. ఈ విషయాన్ని తాము రాజకీయ పార్టీలు, ప్రజా సంఘాల జెఎసి కన్వీనర్ కోదంరామ్ కు తెలియజేస్తామని ఆయన చెప్పారు. తెలుగుదేశం తెలంగాణ ప్రాంత నాయకుల సమావేశానంతరం ఆయన సోమవారం మీడియా ప్రతినిధులతో మాట్లాడారు. కాంగ్రెసు పార్లమెంటు సభ్యులు, మంత్రులు కూడా రాజీనామా చేయాలని, అప్పుడే తెలంగాణపై కేంద్రం మీద ఒత్తిడి పెరుగుతుందని ఆయన చెప్పారు. వచ్చే ఏడాది జనవరి 3వ తేదీన జరిగే విద్యార్థుల జెఎసి మహా గర్జనకు ప్రజలను సమీకరించేందుకు 2వ తేదీన అన్ని నియోజకవర్గాల్లో సమావేశాలు నిర్వహించనున్నట్లు ఆయన తెలిపారు.

జెఎసిలోకి తమను కాంగ్రెసు పార్టీ కూడా ఆహ్వానించిందని ఆయన చెప్పారు. తెలంగాణపై తమ కార్యక్రమాలన్నీ శాంతియుతంగానే జరుగుతాయని ఆయన చెప్పారు. ఉస్మానియా విశ్వవిద్యాలయంలో విద్యార్థులపై ప్రభుత్వ అణచివేత చర్యలను ఆయన ఖండించారు. కేంద్రం సానుకూలంగా ప్రతిస్పందించిందని రాష్ట్రానికి చెందిన తెలంగాణ మంత్రులు చేసిన ప్రకటనపై మీడియా ప్రతినిధులు ప్రస్తావించగా ఆ విషయం వారినే అడగాలని, కేంద్రం నుంచి తమకు స్పష్టమైన లేఖను తెస్తే తమకు అభ్యంతరమేమీ లేదని ఆయన అన్నారు. ఎల్లుండి తెలంగాణ బంద్ ను కూడా ప్రశాంతంగా పాటించాలని ఆయన ప్రజలను కోరారు. విద్యార్థులపై, ఆందోళనకారులపై కేసులు పెట్టి హింసించినంత మాత్రాన ఉద్యమం ఆగిపోదని ఆయన అన్నారు.