ఆరుగురి అరెస్టు: ఆస్పత్రికి తరలింపు

హైదరాబాద్: ఉస్మానియా విశ్వవిద్యాలయంలో ఆమరణ నిరాహార దీక్ష చేస్తున్న ఆరుగురు విద్యార్థులను పోలీసులు సోమవారం అరెస్టు చేసి గాంధీ ఆస్పత్రికి తరలించారు. ఆదివారం రాత్రి విద్యార్థుల దీక్షలను భగ్నం చేసిన సమయంలో ఆరుగురు విద్యార్థులు లోనికి వెళ్లి తలుపులు వేసుకుని దీక్ష కొనసాగించారు. దీంతో ఆ ఆరుగురిని కూడా అదుపులోకి తీసుకునేందుకు పోలీసులు ప్రయత్నించారు. వారిని అడ్డుకునేందుకు విద్యార్థులు తీవ్ర ప్రయత్నం చేశారు. విద్యార్థుల దీక్షా శిబిరాలను కూడా పోలీసులు తొలగించారు. ఆరుగురు విద్యార్థులను పోలీసులు అరెస్టు చేసే సమయంలో దాదాపు గంటపాటు ఉస్మానియాలో తీవ్ర ఉద్రిక్తత నెలకొంది.

విద్యార్థుల దీక్ష భగ్నాన్ని నిరసిస్తూ ఉస్మానియా అధ్యాపకులు, మరింత మంది విద్యార్థులు దీక్షలు ప్రారంభించారు. శిబిరాలు తొలగించడంతో ఎండలోనే వారు దీక్షలు సాగిస్తున్నారు. ఉస్మానియా విద్యార్థుల దీక్షలను పోలీసులు భగ్నం చేశారనే వార్త అందుకున్న వరంగల్లులోని కాకతీయ విశ్వవిద్యాలయం విద్యార్థులు దీక్షలు ప్రారంభించారు. వారికి తెలుగుదేశం శాసనసభ్యులు మద్దతు తెలిపారు. కాకతీయ విద్యార్థులకు మద్దతుగా శాసనసభ్యురాలు సీతక్క దీక్షకు కూర్చున్నారు.