ఆరుగురి అదుపునకు యత్నం: ఉద్రిక్తం

హైదరాబాద్: హైదరాబాదులోని ఉస్మానియా విశ్వవిద్యాలయంలో నిరాహార దీక్ష చేస్తున్న మరో ఆరుగురు విద్యార్థులను అదువులోకి తీసుకునేందుకు పోలీసులు తీవ్రంగా ప్రయత్నిస్తున్నారు. దీంతో విశ్వవిద్యాలయంలో సోమవారం తీవ్ర ఉద్రిక్తత నొలకొంది. ఆదివారం రాత్రి విద్యార్థుల నిరాహార దీక్షను పోలీసులు భగ్నం చేసిన సమయంలో ఆరుగురు విద్యార్థులు లోనికి వెళ్లి తలుపులు వేసుకుని నిరాహార దీక్ష చేస్తున్నారు. వారిని అదుపులోకి తీసుకునేందుకు పోలీసులు ప్రయత్నిస్తున్నారు.

విద్యార్థులు పోలీసులను అడ్డుకుంటున్నారు. పోలీసులకు, విద్యార్థులకు మధ్య వాగ్వివాదం చోటుచేసుకుంది. క్యాంపస్ నుంచి పోలీసులు వెళ్లిపోవాలని విద్యార్థులు నినాదాలు చేశారు. విద్యార్థులకు మద్దతుగా విశ్వవిద్యాలయం అధ్యాపకులు నిరాహార దీక్షలకు దిగారు. విశ్వవిద్యాలయంలో భారీగా అదనపు సిఆర్పీఎఫ్ బలగాలను మోహరించారు. కాగా, వరంగల్లులోని కాకతీయ విశ్వవిద్యాలయంలో విద్యార్థులు ఆమరణ నిరాహార దీక్షలకు దిగారు. దీక్ష చేపట్టి ఆస్పత్రిలో చికిత్స పొందుతున్న కవిరాజు అనే విద్యార్థి ఆరోగ్య పరిస్థితి విషమంగా ఉంది.