గాంధీలో దీక్ష కొనసాగిస్తున్న విద్యార్థులు

హైదరాబాద్: తెలంగాణ డిమాండ్ తో ఉస్మానియా విశ్వవిద్యాలయానికి చెందిన నలుగురు విద్యార్తులు గాంధీ ఆస్పత్రిలో కూడా తమ నిరాహార దీక్షలు కొనసాగిస్తున్నారు. ఆస్పత్రిలో వైద్యులను బయటకు పంపించివేసి తలుపులు వేసుకుని వారు బుధవారం దీక్షలు కొనసాగిస్తున్నారు. తలుపులు తెరిసి, చికిత్సకు సహకరించాలని వైద్య సిబ్భంది విద్యార్థులను కోరుతున్నారు. అయితే వారు అందుకు నిరాకరిస్తున్నారు. ఉస్మానియా విశ్వవిద్యాలయంలో దీక్షలు చేస్తున్నవారిని రెండు రోజుల క్రితం పోలీసులు అదుపులోకి తీసుకుని గాంధీ ఆస్పత్రిలో చేర్చారు.

కాగా, ఉస్మానియా విశ్వవిద్యాలయంలో విద్యార్థులు రిలే నిరాహార దీక్షలు చేస్తున్నారు. గాంధీ ఆస్పత్రిలో దీక్షలు చేస్తున్న కవిరాజు, కళ్యాణ్ అనే విద్యార్థుల ఆరోగ్య పరిస్థితి విషమించినట్లు తెలుస్తోంది. వారిద్దరిని నిజాం వైద్య విజ్ఞాన సంస్థకు తరలించాలని ఉస్మానియా విద్యార్థులు డిమాండ్ చేస్తున్నారు. ఉస్మానియా విశ్వవిద్యాలయం ర్యాలీ తీయడానికి ప్రయత్నించారు. వారిని పోలీసులు అడ్డుకున్నారు.