హస్తినలో నేతల పోటాపోటీ మంతనాలు

న్యూఢిల్లీ: రాష్ట్ర విభజనపై కచ్చితమైన నిర్ణయం కేంద్రం నుంచి వెలువడకపోవడంతో రాష్ట్రంలోని ఇరు ప్రాంతాల నేతలు సమావేశాలతో తలమునకలవుతున్నారు. భవిష్యత్తు పరిణామాలపై, తక్షణ కర్తవ్యంపై వారు చర్చిస్తున్నారు. ప్రాంతాలవారీగా వారు సమావేశాలు నిర్వహిస్తున్నారు. తెలంగాణ రాజకీయ నాయకులు, ప్రజా సంఘాల జెఎసి నేతలు ఢిల్లీలోని కానిస్టట్యూషన్ క్లబ్ లో సమావేశమయ్యారు. రాష్ట్ర విభజనపై కేంద్రం కమిటీ వేయవచ్చుననే ప్రచారం చెలరేగుతున్న సమయంలో వారు చర్చలు జరుపుతున్నారు. తెలంగాణపై కేంద్రం నుంచి కచ్చితమైన నిర్ణయం వెలువడే వరకు తెలంగాణలో ఉద్యమాలు ఆగవని జెఎసి కన్వీనర్ ప్రొఫెసర్ కోదండరామ్ బుధవారంనాడు చెప్పారు. తెలంగాణపై కేంద్రం స్పష్టమైన నిర్ణయాన్ని వెలువరించాల్సిందేనని ఆయన అంటున్నారు. ఈ సమావేశంలో తెలంగాణకు చెందిన అన్ని పార్టీల నాయకులు పాల్గొన్నారు.

కాగా, సీమాంధ్ర తెలుగుదేశం నాయకులు రాజ్యసభ సభ్యుడు ఎంవి మైసురారెడ్డి నివాసంలో సమావేశమయ్యారు. అఖిల పక్ష సమావేశంలో రాయలసీమకు ప్రాతినిధ్యం లేకపోవడం పట్ల మైసురా రెడ్డి అసంతృప్తి వ్యక్తం చేస్తున్నారు. మరో వైపు తెలుగుదేశం తెలంగాణ నాయకులు కేంద్ర హోం మంత్రి పి. చిదంబరాన్ని కలుసుకోబోతున్నారు. కాంగ్రెసు సీమాంధ్ర నాయకులు కూడా చిదంబరాన్ని కలుసుకున్నారు. అలాగే ప్రజారాజ్యం పార్టీ అధ్యక్షుడు చిరంజీవి ఇప్పటికే చిదంబరాన్ని కలుసుకున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మధ్యాహ్నం 3 గంటలకు చిదంబరాన్ని కలుసుకోబోతున్నారు. మంగళవారంనాటి చిదంబరం ప్రకటనపై గానీ, అఖిలపక్ష సమావేశంపై గానీ కెసిఆర్ గానీ, ఆ పార్టీ నాయకులు గానీ ఎటువంటి అభిప్రపాయం కూడా ఇప్పటి వరకు వ్యక్తం చేయలేదు. కాలయాపన చేస్తే సహించబోమని మాత్రమే చెబుతున్నారు. చిదంబరంతో భేటీ తర్వాత కెసిఆర్ మీడియాతో మాట్లాడే అవకాశాలున్నాయి.