చానెళ్లపై కొరడా ఝళిపించాలి: జయప్రకాష్ నారాయణ

హైదరాబాద్: ప్రజలను రెచ్చగొట్టే వార్తాకథనాలను ప్రసారం చేసిన టీవీ చానెళ్లపై కొరడా ఝళిపించాలని లోకసత్తా అధ్యక్షుడు జయప్రకాష్ నారాయణ డిమాండ్ చేశారు. మీడియా చానెళ్ల నియంత్రణకు చర్యలు తీసుకోవాల్సిన అవసరం ఉందని ఆయన శుక్రవారం మీడియా ప్రతినిధుల సమావేశంలో అన్నారు. మీడియాపై నియంత్రణకు ఒక స్వతంత్ర సంస్థను ఏర్పాటు చేయాలని ఆయన సూచించారు. లక్ష్మణ రేఖ దాటిన చానెళ్లను కొంత కాలం నిషేధించాలని ఆయన అన్నారు.మీడియా స్వేచ్ఛ పరిధులు దాటుతోందని ఆయన అభిప్రాయపడ్డారు. దున్నపోతు ఈనిందంటే దూడను కట్టేయండన్నట్లుగా మీడియా చానెళ్లు వ్యవహరిస్తున్నాయని ఆయన వ్యాఖ్యానించారు.

తామేదో తవ్వి తీసినట్లుగా వార్తాకథనాలు రాసి వాటి మీద అభిప్రాయాలు తీసుకుంటూ జుగుప్సాకరంగా మీడియా చానెళ్లు వ్యవహరిస్తున్నాయని ఆయన అన్నారు. వ్యక్తులకు మించిన స్వేచ్ఛ మీడియాకు లేదని, ఆ పరిధిలోనే మీడియా వ్యవహరించాల్సి ఉంటుందని ఆయన అన్నారు. చెత్తాచెదారం పోగు చేసి ప్రసారం చేస్తూ ప్రజలను రెచ్చగొట్టే పద్ధతిలో చానెళ్లు వ్యవహరిస్తున్నాయని ఆయన అన్నారు. రాజకీయాలు దివాళాకోరుతనంగా వ్యవహరిస్తున్నాయని, అదే దివాళాకోరుతనం మీడియాలో కనిపిస్తోందని ఆయన అన్నారు.