మొయినాబాద్ లో తెలంగాణపై మాక్ పోలింగ్

మొయినాబాద్‌: తెలంగాణ రాష్ట్ర సాధన కోసం టిఆర్ఎస్ నాయకులు వినూత్న కార్యక్రమం నిర్వహించారు. పంజరం నుంచి స్వేచ్ఛను కోరుకునే పావురం ఒకవైపు, గోతికాడ దాగి ఉండి అవకాశం రాగానే గుటుక్కున అందుకునే గుంటనక్క మరోవైపు రెండింటినీ గుర్తులుగా పెట్టి మాక్‌ పోలింగ్‌ నిర్వహించారు. తెలంగాణ రాష్ట్ర ఏర్పాటుపై మీ అభిప్రాయాన్ని ఓటు రూపంలో తెలియజేయాలని టీఆర్‌ఎస్‌ నాయకులు కోరారు. సోమవారం మొయినాబాద్‌ సంతకు అన్ని గ్రామాల నుంచి ప్రజలు తరలివస్తారని గుర్తించిన నాయకులు ఈ పోలింగ్‌ నిర్వహించారు. సంతకు వచ్చే ప్రజలతో ఓట్లు తీసుకోవడంతో పాటు హిమాయత్‌నగర్‌లో ఉన్న విజ్ఞాన్‌ జూనియర్‌ కళాశాలలో కూడా ఓటింగ్‌ నిర్వహించారు. మొత్తం 801 మంది పాల్గొనగా అందులో కేవలం 80 మంది సమైక్యరాష్ట్రానికి, మిగతావారంతా తెలంగాణకు ఓటు వేశారు.

తెలంగాణ వ్యాప్తంగా 90 శాతం మంది ప్రజలు తెలంగాణ రాష్ట్రాన్ని కోరుతున్నారని టీఆర్‌ఎస్‌ జిల్లా ఉపాధ్యక్షుడు గడ్డం వెంకట్‌రెడ్డి అన్నారు. మాక్‌ ఓటింగ్‌ నిర్వహించిన తరువాత ఆయన విలేకరులతో మాట్లాడారు. తెలంగాణ రాష్ట్రం ఏర్పడితే తప్ప తమ బతుకులు మారవనే అభిప్రాయం ప్రజల్లో నాటుకు పోయిందన్నారు. సాగునీరు, ఉద్యోగాలు, స్వయంపాలన దక్కాలంటే కేంద్ర ప్రభుత్వం వెంటనే తెలంగాణ రాష్ట్రాన్ని ఏర్పాటు చేయాలని ప్రజలు డిమాండ్‌ చేస్తున్నారన్నారు. తెలంగాణ ప్రజలను మరోసారి మోసం చేయకుండా రాష్ట్ర ఏర్పాటుకు ప్రక్రియ మొదలు పెట్టాలని ఆయన డిమాండ్‌ చేశారు.