ముక్కలు చేస్తే సహించం: సమైక్యాంధ్ర జెఎసి

విజయవాడ: రాష్ట్రాన్ని ముక్కలు చేస్తే సహించబోమని సీమాంధ్ర జెఎసి నాయకులు శుక్రవారం మీడియా ప్రతినిధుల సమావేశంలో హెచ్చరించారు. కేంద్ర హోం మంత్రి చిదంబరం వేసే కమిటీ వల్ల సమైక్యాంధ్రకు విఘాతం కలిగితే సునామీ సృష్టిస్తామని జెఎసి నాయకులు దేవినేని ఉమా మహేశ్వర రావు, మండలి బుద్ధప్రసాద్ అన్నారు. చిదంబరం తాజా ప్రకటన నేపథ్యంలో జెఎసి సమావేశమై భవిష్యత్తు కార్యాచరణపై ప్రకటించింది. సమావేశానంతరం వారు మీడియా ప్రతినిధులతో మాట్లాడారు.

తెలంగాణలో అత్యధికులు సమైక్యాంధ్రవాదాన్నే కోరుకుంటున్నారని వారన్నారు. అయితే వారు తమ గొంతు విప్పడానికి భయపడుతున్నారని వారు అభిప్రాయపడ్డారు. తెలంగాణ జెఎసి డెడ్ లైన్లకు భయపడి కేంద్రం తొందరపాటు నిర్ణయాలు తీసుకోవద్దని వారు కోరారు. తెలంగాణ జెఎసి ఒత్తిళ్లకు తలొగ్గి చిదంబరం ఏదో ఒక ప్రకటన చేస్తున్నారని వారు విమర్శించారు.