తెలంగాణ కమిటీకి సీమాంధ్ర నేతల వ్యతిరేకత

హైదరాబాద్: తెలంగాణ కోసం ఏర్పాటు కాబోయే కమిటీపై సీమాంధ్ర నేతలు తీవ్ర వ్యతిరేకత ఎదురవుతోంది. రాష్ట్ర విభజనకు కమిటీ వేస్తే తీవ్రంగా వ్యతిరేకిస్తామని వారంటున్నారు. కేంద్ర మంత్రి పి. చిదంబరం వేయబోయే కమిటీపై తీవ్ర ఉత్కంఠ నెలకొంది. ఈ స్థితిలో సమైక్యాంధ్ర నేతలు చాలా మంది ఇప్పటికే ఢిల్లీలో మకాం వేశారు. రాష్ట్ర విభజనకు కమటీ వేస్తే తీవ్రంగా వ్యతిరేకిస్తామని రాయలసీమ, కోస్తాంధ్ర నాయకులు చెబుతున్నారు. రాష్ట్ర విభజన కోసం కమిటీ వేస్తే రాయలసీమకు అన్యాయం జరుగుతుందని కాంగ్రెసు శాసనసభ్యుడు టీజీ వెంకటేష్ అన్నారు. రాయలసీమ, కోస్తాంధ్రల్లో సమైక్యాంధ్ర జెఎసిలు సమావేశమయ్యాయి. సమైక్యాంధ్ర కోసం రాజకీయ నాయకులు నిలబడాలని జెఎసిలు డిమాండ్ చేశాయి.

తమ సమైక్యాంధ్ర ఉద్యమాన్ని ఉధృతం చేస్తామని అనంతపురంలో జరిగిన జెఎసి సమావేశంలో కాంగ్రెసు నాయకుడు శైలజానాథ్, తెలుగుదేశం నాయకుడు పయ్యావుల కేశవ్ చెప్పారు. తెలంగాణపై ఏకపక్ష నిర్ణయం తీసుకునే అధికారం చిదంబరానికి లేదని ప్రజారాజ్యం పార్టీ నేత సి. రామచంద్రయ్య అన్నారు. తెలంగాణకు అనుకూలంగా నిర్ణయం తీసుకునేందుకు కమిటీ వేస్తే చూస్తూ ఊరుకోమని కాంగ్రెసు పార్లమెంటు సభ్యుడు రాయపాటి సాంబశివ రావు అన్నారు. తెలంగాణపై కేంద్రం వేసే కమిటీని అంగీకరించబోమని తెలుగుదేశం నాయకురాలు నన్నపనేని రాజకుమారి అన్నారు. సమైక్యాంధ్ర కోసం మేధావులు గళం విప్పాలని కాంగ్రెసు నాయకుడు మండలి బుద్ధప్రసాద్ పిలుపునిచ్చారు. కేంద్రం వేసే కమిటీతో అందరికీ న్యాయం జరుగుతుందని కేంద్ర మంత్రి పురంధేశ్వరి అన్నారు.