మొయిలీ ఆదేశాలపై కాంగ్రెసులో తలోమాట

హైదరాబాద్: తెలంగాణ జెఎసి నుంచి కాంగ్రెసు నాయకులు బయటకు రావాలని పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ చేసిన సూచనపై రాష్ట్రంలోని పార్టీ నాయకులు తలోమాట అంటున్నారు. కాంగ్రెసు నాయకులు తెలంగాణ జెఎసి నుంచి బయటకు రావడానికి ఇష్టంగా లేనట్లు ఆ ప్రటనలను బట్టి అర్థమవుతోంది. విధిలేని పరిస్థితిలోనే తెలంగాణ కాంగ్రెసు నాయకులు జెఎసిలో చేరాల్సి వచ్చిందని, చిదంబరం డిసెంబర్ 9న చేసిన ప్రకటనను మారుస్తూ రెండో ప్రకటన చేశాకనే జెఎసిలో చేరామని కాంగ్రెసు నాయకుడు జీవన్ రెడ్డి అన్నారు. జెఎసి ఏర్పడిందే కాంగ్రెసు నేత జనార్దన్ రెడ్డి నివాసంలోనని ఆయన అన్నారు. తెలంగాణ అంశాన్నిపక్కన పెట్టి జెఎసి గురించి మాట్లాడడమేమిటని ఆయన అన్నారు. జెఎసి కాంగ్రెసు పార్టీకి వ్యతిరేకం కాదని కాంగ్రెసు తెలంగాణ కార్యాచరణ కమిటీ కన్వీనర్ బస్వరాజు సారయ్య అన్నారు. కేంద్రం వేసే కమిటీకి జెఎసి పూర్తిగా సహకరిస్తుందని ఆయన చెప్పారు.

జెఎసి అంటే ఏమిటో తనకు తెలియదని, మొయిలీ ప్రకటనను తాను ఇంకా చూడలేదని కాంగ్రెసు సీనియర్ నాయకుడు కె. కేశవ రావు అన్నారు. తాను హైదరాబాదు వచ్చిన తర్వాత అందరితో మాట్లాడి జెఎసిలో ఉండే విషయంపై నిర్ణయం తీసుకుంటామని మరో నేత అమోస్ అన్నారు. ప్రశాంత వాతావరణం కోసమే మొయిలీ ఆ ప్రకటన చేసి ఉంటారని కాంగ్రెసు సీనియర్ నేత వి. హనుమంత రావు అన్నారు. కెసిఆర్ చెప్తే జెఎసి పనిచేస్తోందని ఆయన విమర్శించారు. జెఎసిలో ఉన్న కాంగ్రెసు నాయకులే మొయిలీ ప్రకటనపై ఆలోచించాలని ఆయన అన్నారు. మొయిలీ మాటలు తెలంగాణ నాయకులకే కాకుండా సీమాంధ్ర కాంగ్రెసు నాయకులకు కూడా వర్తించాలని కాంగ్రెసు పార్లమెంటు సభ్యుడు వివేక్ అన్నారు.