ముంబై ఇటాలియన్ మమ్మీది కాదు: థాకరే

ముంబై: ముంబై భారతీయులందరిదీ అని కాంగ్రెసు నాయకుడు రాహుల్ గాంధీ చేసిన ప్రకటనపై శివసేన బుధవారం తన దాడిని పెంచింది. రాహుల్ గాంధీ తల్లి, కాంగ్రెసు అధ్యక్షురాలు సోనియా గాంధీ విదేశీయతను ముందుకు తెచ్చింది. ముంబై భారతీయులందరిదీ కావచ్చు గానీ ఇటాలియన్ మమ్మీది మాత్రం కాదని శివసేన చీఫ్ బాల్ థాకరే అన్నారు. శివసేన అధికారిక పత్రిక సామ్నాలో ఆయన తన సంపాదకీయంలో ఆ విధంగా అన్నారు. కాంగ్రెసు యువరాజు పూర్తి నిస్పృహలో కొట్టుమిట్టాడుతున్నారని, ఆ నిస్పృహలోనే మరాఠీ ప్రజలను, మహారాష్ట్రను అవమానిస్తున్నారని ఆయన విమర్శించారు.

ఎవరు పడితే వారు వచ్చి ఉమ్మేసి వెళ్లిపోవడానికి ముంబై ధర్మసత్రం కాదని ఆయన అన్నారు. 1920లో సంయుక్త మహారాష్ట్ర ఉద్యమంలో 105 మంది మరణించడాన్ని ప్రస్తావిస్తూ ముంబైని ధర్మసత్రం చేయడానికి వారు ప్రాణాలర్పించలేదని ఆయన అన్నారు. ముంబై దాడుల్లో బీహారీ కమెండోలు ప్రధాన పాత్ర పోషించారని రాహుల్ గాంధీ అనడం హేమంత్ కర్కరే, విజయ్ సలాస్కర్, ఆశోక్ కామ్టే, తుకారాం ఓంబ్లే వంటి వారి ప్రాణత్యాగాలను అవమానించడమేనని ఆయన అన్నారు.