తెలంగాణపై కాలయాపనకే కమిటీ: నాగం జనార్దన్ రెడ్డి

హైదరాబాద్: తెలంగాణ రాష్ట్ర ఏర్పాటుపై మరింత కాలయాపన చేసేందుకే కేంద్ర ప్రభుత్వం కమిటీ వేసిందని తెలుగుదేశం తెలంగాణ నాయకుడు నాగం జనార్దన్ రెడ్డి వ్యాఖ్యానించారు. తెలంగాణ ప్రజల మనోభావాలను ఇంకా కించపరచవద్దని ఆయన బుధవారం మీడియా ప్రతినిధుల సమావేశంలో అన్నారు. కమిటీ ఏర్పాటుతో కాంగ్రెసు తెలంగాణ ప్రజాప్రతినిధుల బాధ్యత మరింత పెరిగిందని ఆయన అన్నారు. రాష్ట్ర విభజనపై స్పష్టత రావాలని ఆయన అభిప్రాయపడ్డారు. కాలపరిమితితో కూడిన ప్రకటన వచ్చే వరకు కేంద్ర ప్రభుత్వంపై కాంగ్రెను నాయకులు ఒత్తిడి తెవాలని ఆనయ సూచించారు.

కమిటీ పేరుతో కాంగ్రెసు అధిష్టానం మరోసారి తెలంగాణను మోసం చేస్తోందని తెలుగుదేశం తెలంగాణ నాయకుడు మోత్కుపల్లి నరసింహులు అన్నారు. ప్రస్తుతం వేసిన కమిటీని రద్దు చేసి తెలంగాణ రాష్ట్ర ఏర్పాటుకు మాత్రమే కమిటీ వేయాలని ఆయన బుధవారం మీడియా ప్రతినిధుల సమావేశంలో డిమాండ్ చేశారు. తెలంగాణ ప్రజలు కేంద్ర ప్రభుత్వం వేసిన కమిటీని నమ్మబోరని ఆయన అన్నారు. తెలంగాణ రాష్ట్ర ఏర్పాటును తెలంగాణ ప్రజలు కోరుకుంటున్నారని ఆయన అన్నారు.