ఒయులో నక్సల్స్ ఉంటే చూపండి: సుప్రీంకోర్టు

న్యూఢిల్లీ: హైదరాబాదులోని ఉస్మానియా విశ్వవిద్యాలయంలో నక్సలైట్లు ఉన్నారనడానికి నిర్దిష్టమైన ఆధారాలు చూపాలని సుప్రీంకోర్టు ఆంధ్రప్రదేశ్ ప్రభుత్వాన్ని ఆదేశించింది. అందుకు ప్రభుత్వం తరఫు న్యాయవాది గడువు అడిగారు. దీంతో సుప్రీంకోర్టు కేసు విచారణను గురువారంనాటికి వాయిదా వేసింది. నిఘా సంస్థ నివేదికను కూడా తమకు అందించాలని సుప్రీంకోర్టు ప్రభుత్వాన్ని ఆదేశించింది. ఉస్మానియా విశ్వవిద్యాలయంలో బలగాల మోహరింపును ఉపసంహరించాలని హైకోర్టు ఇచ్చిన ఆదేశాలను రాష్ట్ర ప్రభుత్వం సుప్రీంకోర్టులో సవాల్ చేసింది. హైకోర్టు ఆదేశాలపై స్టే విధిస్తూ సుప్రీంకోర్టు విచారణ చేపట్టింది.

ఉస్మానియా విశ్వవిద్యాలయంలో నక్సలైట్లు లేరని, అన్ని కార్యక్రమాలు కూడా ప్రశాంతంగానే జరుగుతున్నాయని తాము సుప్రీంకోర్టుకు విన్నవించినట్లు ఒయు విద్యార్థుల తరఫు న్యాయవాది చెప్పారు. బలగాల మోహరింపు వల్లనే పరిస్థితి విషమిస్తుందని ఆయన అన్నారు. తెలంగాణ ఉద్యమాన్ని అణచివేయడానికే ప్రభుత్వం పారా మిలటరీ బలగాలను, ఇతర బలగాలను ఒయులో మోహరిస్తోందని తాము సుప్రీంకోర్టుకు విన్నవించామని ఆయన అన్నారు. అణచివేత చర్యలకు దిగితేనే విద్యార్థులు నక్సలైట్లుగా మారే ప్రమాదం ఉంటుందని, 1969లో అటువంటి పరిస్థితే ఎదురైందని ఆయన అన్నారు. మావోయిస్టు నేత కిషన్ జీ ఒక ప్రముఖ తెలుగు టీవీ చానెల్ కు ఇచ్చిన ఇంటర్వ్యూ సిడిని ప్రభుత్వ తరఫు న్యాయవాది కోర్టుకు అందజేసినట్లు ఆయన తెలిపారు.