తెలంగాణ వేదికపై చంద్రబాబుపై గుర్రు

హైదరాబాద్: పార్టీలో తెలంగాణ వేదిక ఏర్పాటుపై తెలుగుదేశం సీమాంధ్ర నాయకులు పార్టీ అధ్యక్షుడు నారా చంద్రబాబు నాయుడిపై గుర్రుగా ఉన్నారు. నాగం జనార్దన్ రెడ్డి కన్వీనర్ గా గురువారం తెలంగాణ ఫోరం ఏర్పాటైంది. దీనికి చంద్రబాబు పచ్చజెండా ఊపారు కూడా. దీన్ని తెలుగుదేశం సీమాంధ్ర నాయకులు తీవ్రంగా వ్యతిరేకిస్తున్నారు. పార్టీలో రెండు వేదికలు ఉండడం సరి కాదని తెలుగుదేశం సీమాంధ్ర శాసనసభ్యుడు ధూళిపాల్ల నరేంద్ర చౌదరి శుక్రవారం మీడియా ప్రతినిధుల సమావేశంలో అన్నారు. పార్టీలో రెండు అభిప్రాయాలు సరి కాదని ఆయన అన్నారు. ఈ విషయాన్ని తాము పార్టీ అధ్యక్షుడు నారా చంద్రబాబు నాయుడి దృష్టికి తీసుకుని వెళ్తామని ఆయన అన్నారు.

జస్టిస్ శ్రీకృష్ణ కమిటీ ముందు తెలంగాణ రాష్ట్ర ఏర్పాటు ఆవశ్యకతపై నివేదిక సమర్పించడానికి, తెలంగాణ ఉద్యమాన్ని బలోపేతం చేయడానికి గురువారం తెలుగుదేశం తెలంగాణ నాయకులు ప్రత్యేక ఫోరాన్ని ఏర్పాటు చేసుకున్నారు. శ్రీకృష్ణ కమిటీకి సమర్పించే నివేదిక రూపకల్పనకు ఒక కమిటీని కూడా ఏర్పాటు చేశారు. దీనికి చంద్రబాబు ఆమోద ముద్ర కూడా లభించింది. దీంతో చంద్రబాబు తెలంగాణ వైపు మొగ్గు చూపుతున్నారనే అభిప్రాయం పార్టీ సీమాంధ్ర నాయకుల్లో నెలకొంది.